सगळ्यांक नमस्कार आनि देव बरो दीस दिवं म्हुण मागता .
एकवोटावोर्वी उजवाड आतां 24व्या वरसांत पावल मारता ही खूब खोशेची गजाल व्हय. उजवाड ह्या नावान सुरु जाल्ल्या उजवाडाक एकवोटवोर्वीं उजवाड अशें अधिकृत नाव रजिस्ट्रार ऑफ़ न्युजपेपर्स फ़ॉर इंडिया हांचे वोर्वीं मेळ्ळे, ह्या खातीर उजवाड एकवोटावोर्वी उजवाड जालो.
२३ वरसांची खडतर वाटचाल, 125 वयर खेड्यांची- शारांची भ्रमंती, 55 रुपयांची वर्गणी वो पटी घेवंक धडपड आनी उजवाडची ज्योत तेवत दवरचो प्रयत्न, घाटमाथो प्रदेशातल्या कोंकणी मनशाचे अस्तित्वा बद्दल गोय आनी सगळ्या प्रिथुमिक जाणवाय करुन दिवप आनी कोंकणी मनशाचो एकवोट घडोवन हाडून कोंकणी भास आनी संस्कृताय थिगोवन दवरप, अशे बहुरंगी- बहुढंगी आनी इतिहासिक कार्य उजवाड वोरवी साध्य जाला.
आयज सबंध घाटमाथो प्रदेश, गोय, सिंधुदुर्ग, पुणे, मुबय आनी कोची मेरेन उजवाड पावला. फाटल्या 23 वरसांच्या वाटचालीत उजवाडच्या वाटचालीत कांटे उडयचो जरी प्रयन जालों आसलो तरी सामान्य कोंकणी मनशान फुला उडोवन ही वाटचाल खूब सुखकर केली.
ही वाटचाल सुरू आसताना ह्या वावराची जायती तोखणाय जाली आनी उजवाडच्या कार्या पासोत स्थानिक आनी राष्ट्रीय पावंड्यार जायते पुरस्कार लेगित फावो जाले. ह्या वोर्वी आमची उर्बा वाडली. आमचो वावर बरो आसा म्हून साबारांनी कोंकणी मोग्यांनी जात, पात, धर्म आनी प्रदेश हांच्या पलतडी वचून जायाराती आनी वर्गणी वोरवी आधार दिलो.
फाटल्या 23 वर्सांची खडतर वाटचाल आनी उजवाडाक मेळपी तेंको पळेयल्यार उजवाड आता लोकप्रियतेच्या शिखरार पावला आनी तो एक ब्रँड जाला अशे मीडिया मळावयल्या तज्ञांनी आपले मत व्यक्त केला.
आधुनिक जगाच्या वेगांत थिगून रावून खिणाखिणाक कोंकणी अपडेट्स कोंकणी पर्जेक मेळचे आनी नव्या पिळगीच्या सदा संपर्कात रावून कोंकणी भास आनी संस्कृताय बलिष्ठ जावंची ह्या आमच्या उद्दिष्टाक लेगून तुमच्या सेवेत हि वेबसाईट सादर करुन तिचे लोकार्पण करताना खूब आनी खूब खुशालकाय भोगता. जाय कोंकणी जय कोंकणी🙏💐
