पणजी : गोंयांत आतां मेरेन 1 ते 18 वर्सां पिरायेच्या 22371 भुरग्यांक कोरोनाची लागण जाल्या. तशेंच 9 भुरग्यांक कोरोना दुयेंसान मरण आयलां. कोरोनाचें दुसरें ल्हार ल्हान भुरग्यां खातीर थारलें घाताचें. आतां कोरोनाचें तिसरें ल्हार येवप शक्य आसा, मात तें दुसऱ्या ल्हारा इतलें खर आसचे ना, अशें तज्ञ समितीचे वांगडी डॉ. शेखर साळकार हांणी सांगलां.
कोरोना दुयेंसाचें प्रमाण उणें जाल्ल्यान आतां सगले वेव्हार सुरू जाल्यात. एसओपी आसली तरी आतां कर्फ्यू ना. दुयेंसाचें प्रमाण उणे जाल्ल्यान हायब्रीड पद्दतीन विद्यालयांतले वर्ग सुरू करपाची शिफारस तज्ञ समितीन केल्या. कृती पंगडाच्या बसके उपरांत वर्ग सुरू करपाचो निर्णय जावपाचो आसलो तरी कोरोनाक लागून भुरग्यांक मरण येवप ही गजाल गंभीर आसा.
News Views: 644