गोंयांतल्या वायल्डरनेस्ट नेचर रिसोर्ट आनी स्वप्नगंधा रिसोर्टांत हालींच स्लोप ट्रेन प्रकल्पाचें उक्तावण जालें.हातूंत दोंगराचेर तयार केल्ल्या खास रेलगाडयेंतल्यान पश्चिम घांट, सूर्यास्त, धबधबो, पणजी शार, अरबी समुद्र पळोवपाक मेळटा. ह्या प्रकल्पाचें आदले मुख्यंमंत्री प्रतापसिंह राणे, विजयादेवी राणे, लोकामन्य सोसायटीचे अध्यक्ष किरण ठाकूर, पांडुरंग धोंड, नितीन धोंड आनी हेर मानेस्त हाजीर आशिल्ले.
कांय रानांनी वचपाक मेळना थंय आनी सैममोगी पर्यटकांखातीर रानांचें दर्शन घडोवपाक असले प्रकल्प गोंयांत हेर कडेन सुरु जावपाक जाय, अशें स्वप्नगंधा रिसोर्ट प्रा.लिमिटेडाचे वेवस्थापकी संचालक कॅप्टन नितीन धोंड हांणी सांगलें. पूर्णता देशी बनावटीचो हो प्रकल्प बेळगांवच्या रचना इन्फोटेकान तयार केला. हो स्लोप ट्रेन प्रकल्प 110 मिटरांचो आसा. ते ट्रनींत बसून वझरा सकला धबधबो आनी म्हादय अभयारण्यांची 360 अंशान पळोवणी करपाक मेळटा. होर्नबिल आनी हेर सुकणीं हे भोंवडेंत दिश्टी पडटात.
संवेदनशील रान वाठारांनी, जंय रस्त्यान वचपाक मेळना, थंय असले प्रकल्प सुरु करपाक जाय, अशें किरण ठाकूर हांणी सांगलें. ह्या वेळार कंत्राटदार गोविंद सरकार, स्वप्नगंधाचे संचालक निर्मल कुलकर्णी, संचय कुलकर्णी, अभय तेंडुलकार, राजेश, वेरेंकार, रमण कामत आनी हेर मानेस्त हाजीर आशिल्ले.
