मडगांव : प्रा. सुभाष वेलिंगकार हांणी सेंट फ्रान्सिस झेवियर हांचेर आक्षेपार्ह विधानां करून धर्मीक भावना दुखयल्यात. तांचे आड दिवचल पुलिशेंत गुन्यांव नोंद जाला. वेलिंगकार हांकां अटक करपाचे मागणे खातीर तियात्रिस्त मुख्यमंत्र्यांक निवेदन दितले अशें तियात्रिस्त मिनीनो फर्नाडिस हांणी सांगलें.
मडगांव रवींद्र भवना भायर तियात्रिस्तांनी एकठांय जावन वेलिंगकार हांकां अटक करपाची मागणी केली. मिनीनो हांणी सांगलें, गोंयां सयत संवसारभरांतल्या क्रिस्तांव लोकांच्यो धर्मीक भावना वेलिंगकार हांणी दुखयल्यात. हाका लागून राज्यांत वेगवेगळ्या सुवातींनी आंदोलनां सुरू आसात. हेच फाटभुंयेर आतां तियात्रिस्त एकठांय आयल्यात आनी सगळ्यांच्यो सयो आशिल्ले निवेदन मुख्यमंत्र्या सयत उत्तर गोंय जिल्हो पुलीस अधीक्षकांक दितले. वेलिंगकार हांच्या विधानाचो निशेध करून सगल्या धर्मांतले लोक रस्त्यार देंवले आनी निशेध केलो. तशेंच अशीं विधानां परत करची न्हय म्हणून वेलिंगकार हांकां अटक करपाची गरज आसा अशें तांणी सांगलें.
प्रिन्स जेकॉब हांणी सांगलें, तियात्रिस्त आंदोलनांत नात अशें न्हय. कांय तियात्रिस्तांनी वांटो घेतिल्लो. ह्या विशयाचेर तियात्रकारांनी लोकांक जागृत केला. वेलिंगकार हांचेर कारवाय करपाची मागणी आसा आनी ते प्रमाण सरकारान कारवाय करची. सेंट झेवियराच्या विशया वेल्यान लोक एकठांय आयल्यात आनी अशेंच एकवटीत जावन लोक गोंय सांबाळटले अशेंय जेकॉब हांणी सांगलें. वेलिंगकार हांचेर कसलोच गुन्यांव नोंद जावंक ना, देखून लोकांनी आंदोलन केलें. आतां तांकां अटक करुन राज्यांत शांतताय आनी सुवेवस्था तिगोवन दवरपाचो यत्न करचे अशी मागणी तियात्रिस्तांनी केली.
