उजवाड नेमाळ्याचो रुप्या महोत्सव वर्सात पदार्पण सुवाळो आनी नाताल विशेशांकाचे उक्तावण

कोंकणी भाशेचे उदरगती खातीर उजवाड नेमाळ्याचें मोलादीक योगदान – फिरोज सेठ

उजवाड चलोवंक सगळ्यांचो तेंको दिवचो : बिशप डेरीक फर्नांडिस

उजवाड ब्युरो, बेळगांवः बेळगांवच्यान उजवाडाक येवपी कोंकणी म्हयनाळे उजवाडाच्या 25व्या वर्सात पदार्पणा निमतान आनी उजवाडच्या २५ व्या नाताल विशेशांकाच्या उक्तावण निमतान कॅम्पांतल्या नाझरेथ हॉलांत एक कार्यावळ घडोवन हाडली. बेळगाव डायोसिसाचो बिशप डॉ. डेरेक फर्नांडीस अध्यक्ष स्थानाचेर आसले, तर मुखेल सोयरें म्हूण माजी आमदार फिरोझ सेट, तसेच केएलई संस्थेचे अध्यक्ष डॉ. प्रभाकर कोरे हजर आसले. संपादकीय सल्लागार गिरगोल रॉड्रिगीस, अभियंते जे.जे. बर्देस्कर, गोंयचो लेखक उदय देशप्रभू, इचलकरंजिचो तरणाटो उद्देजक मनवेल रॉड्रिगीस आदी मंचाचेर हाजीर आशिल्ले.

संपादक लुईस रॉड्रिगीसान परिचय आनी येवकार दिलो. उजवाडान २५व्या वर्सांत केन्ना पावल मारले हे आमकां कळ्ळेच ना. २४ वर्सांचो हो प्रवास जितलो खडतर तितलोच आव्हानात्म्क पूण रोमांचक आसलो अशे ताणीं सांगले. आयज घाटमाथो आनी हेर सुवातींनी शिंपडिल्ल्या सादारण ३००० वयर घरांनी उजवाड वाचतात अशेय ताणीं सांगले.

ह्या वेळार उजवाड् रुप्या महोत्सव वर्साच्या उक्तावण सुवाळ्याचें उक्तावण बिशप फर्नांडीस आनी मानेस्तांनी दिवो पेटोवन केलें. तशेंच उजवाड  नाताल खाशेलो अंक फिरोज शेठ आनी मानेस्तांनी उजवाडायलो.

प्रभाकर कोरे हांकां ताच्या ७५व्या अमृत महोत्सवी वड दिवसाच्या निमतान उजवाड नेमाळ्यान मानेस्तांनी भोवमान केलो.

कोंकणी भाशेचे उदरगती खातीर उजवाड नेमाळ्याचें योगदान अमूल्य आसा अशें फिरोज सेठ हांणी ह्या संदर्भार सांगलें.

बिशप डेरीक फर्नांडीस : नेमाळें वा दिसाळें चलोवप हें आयच्या काळांत सोंपें काम न्हय. बेळगांव सारक्या वाठारांतल्यान कोंकणी नेमाळें चलोवप म्हळ्यार तारेवयली कसरत आसा, पूण संपादक लुईस रॉड्रीग्स आनी तांच्या वांगड्यांनि हो वावर खूब जिद्दीन आनी नेटान चलयता ताचे खातीर हांव तांची सगळ्यांची तोखणाय करता. तशेंच कोंकणी भास प्रदेशाप्रमाण वेगवेगळी आसता. गोंय, मंगळूर, कारवार, उडुपी ह्या कोंकणी भाशेंत फरक आसा. पूण संपादक लुवीस रॉड्रिगीस आनी ताच्या पंगडान 25 वर्सां हें नेमाळें खूब बरे तरेन चलयलां, देखून तांकां परबीं दिवपाक फावो अशें बिशप डेरेक फर्नांडीसान त्या वेळार सांगलें.

घाटमाथो, उत्तर कर्नाटक आनी दक्षिण महाराष्ट्रांत कोंकणी भास सांबाळपाक ह्या नेमाळ्याचो शिंवाचो वांटो आसा अशे बिशप फर्नांडीस हांणी मत उक्तायलें.

ह्या काऱ्यक्रमाक गोंय, महाराष्ट्र आनी बेळगांव वाठारांतले कोंकणी उलोवपी हाजीर आशिल्ले.

ह्या कार्यावळीचे सुत्रसंचालन मिनीन गोन्साल्वेस, उपसंपादक हांणी केलें. एलेन बोर्जेस हांणी उपकाराचें मत दिलें.