उजवाड ब्युरो : आधार कार्ड भारतीय लोकां खातीर खूब म्हत्वाचो दस्तावेज. हाचे वरवीं जायतीं कामां सहजपणान करूं येतात. पूण, तुमचें आधार कार्ड खंय वापरतात तें तुमकां कळपाक जाय. तुमच्या आधाराचो कोणे तरी गुपीतपणान गैरवापर केला काय ना तें तुमी तपासपाक जाय.
आधारांत नांव आनी पत्तो सयत बायोमेट्रीक तपशीलूय आसता. हो डाटा चुकीच्या हातांत पडचो न्हय हें तुमच्या गुप्तताये खातीर म्हत्वाचें. देखून आधार तयार करपी सरकारी संस्था युनिक आयडेंटिफिकेशन अथॉरिटी ऑफ इंडिया (UIDAI) तुमकां आधार इतिहास पळोवपाची सुविधा दिता. हाचे वांगडाच तुमकां तुमच्या आधाराचो खंय वापर जाला तें कळटलें.
UIDAI आपल्या संकेतथळार आधार प्रमाणीकरण इतिहास सेवा दिता. हांगाच्यान तुमकां कळटलें की आतां मेरेन खंयच्या एजन्सीनी तुमचे आधार कार्ड वापरला. एका वेळार तुमी फाटल्या 6 म्हयन्यांची वळेरी वा चडांत चड 50 रेकॉर्ड पळोवंक शकतात.
प्रमाणीकरण इतिहास सेवा (https://resident.uidai.gov.in/aadhaar-auth-history) ह्या संकेतथळा वयल्यान तपासूं येता. तुमकां जाय जाल्यार तुमी mAadhaar app वयल्यान पुराय रेकॉर्ड तपासूंक शकतात.
तुमी दरेक आधार प्रमाणीकरण तपासूंक शकतात आनी ‘हे’ तपशील सोदून काडूंक शकतात.
० प्रमाणीकरणाची पद्धत : आधाराचो तपशील बायोमेट्रीक (फिंगरप्रिंट, दोळे, तोंड), डेमोग्राफिक वा ओटीपी वेल्यान घेतला काय ना तें तुमकां कळटलें.
० प्रमाणीकरणाची तारीख आनी वेळ : खंयच्या तारखेक आनी वेळार आधार कार्ड वापरला तें तुमकां कळटलें.
० युआयडीएआय प्रतिसाद कोड : जेन्ना केन्नाय आधार खंयच्याय कामा खातीर वापरतात तेन्ना यूआयडीएआय प्रतिसाद कोड जारी करता.
० AUA चें नांव : ऑथेंटिकेशन यूजर एजन्सी (AUA) ही एक एजन्सी, जी तुमचो आधार वापरता, जशें दूरसंचार कंपनी, बँक, रेशना खातीर, हेर विभाग आदी.
० AUA ट्रान्झॅक्शन आयडी (कोड सयत) : जेन्ना जेन्ना आधाराचे प्रमाणीकरण जाता तेन्ना तेन्ना कोडासयत वेव्हार आयडी तयार जाता. AUA हो आयडी UIDAI बरोबर शेअर करता.
० प्रमाणीकरण प्रतिसाद : हातूंतल्यान तुमचें आधार प्रमाणीकरण येसस्वी जालें काय अपेसी तें कळटा.
० UIDAI एरर कोड : ऑथेंटिकेशन अपयेसी जाल्यार UIDAI एरर कोड दाखयता. हे एरर कोड ऑथेंटिकेशनान कित्याक अपेस आयलें तेंय दाखयतात.
आधाराचो गैरवापर जाल्यार कितें करचें?
जर तुमकां आधार प्रमाणीकरण तपासपाचें आसल्यार, जें 6 म्हयन्यां परस पोरणें वा 50 परस चड आसल्यार तारीख निवडात. तशेंच, नकळत खंय तरी आधाराचो वापर जाला अशें तुमकां दिसल्यार संबंदीत एयूए कडेन संपर्क सादचो. आधार इतिहास तपासपाचो आसल्यार मोबायल नंबर आधार कडेन नोंद करपाची गरज आसा, मागीरच तुमकां लॉगीन करपाक मेळटलें.
