उजवाड ब्युरो, पणजी : मणीपुराक मजत घेवन वचपी तिसरो ट्रक 20 आॅक्टोबराक गिरीं- सांगोल्डेंच्या सेंट डायगो चर्ची कडल्यान भायर सरतलो. स्ट्रीट प्रॉव्हिडन्स गोंयच्या स्वयंसेवकांनी हें जाहीर केलां.
ह्या ट्रकांत पांच हजार नव्यो दाट चादरी, कांबळी आसात, 20 मेरेन तो आंकडो वाडटलो. इंफाळ आर्चडायोसीसांतले एक तरणाटे नागा पाद्री फादर इग्नेशियस ह्या तिसऱ्या ट्रकाक बेसांव दितले. सेवानिवृत्त आयपीएस अधिकारी जॉन शिल्शी ट्रकाक बावटो दाखयतले. ह्या ट्रकांत बिस्कुट, कांय वस्तू, सेरेलॅक, लॅक्टोजन आसतलें. मणीपुरा खातीर मजत करपी सगल्यांचे आमी उपकारी आसात, अशें संबंदीत संस्थेन कळीत केलां.
मणिपूरांत शिंयाळो लागीं पावला. सुमार 55 हजार लोक मजत शिबिरांनी रावतात. तांचे खातीर कांबळी, दाट चादरी उपेगी पडटल्यो. दुसऱ्या ट्रकांतल्यान 16 सप्टेंबराक 2300 चादरी धाडिल्ल्यो. 10,000 चादरी धाडपाचें लक्ष्य दवरलां. ह्या तिसऱ्या ट्रकांत उरिल्ल्यो 7700 चादरी धाडपाक शकनात जाल्यार चवथ्या ट्रकांतल्यान 18 नोव्हेंबराक त्यो धाडटले. त्या ट्रकाक मणिपूरचे आर्चबिशप रेव्ह फादर डाॅमनिक लुमोन बावटो दाखयतले. तिसरो ट्रकाक 20 ऑक्टोबराक सांजवेळा 4 वरांचेर सुटता. तेन्ना सगल्यांनी हजर रावचें, असो उलो आयोजकांनी मारला.
मणिपूरांतलें जिवीत अजूनय कठीण आसा. हे घडणुकेक पांच म्हयने जावन पसून वेदना आनी दुख्ख आसा. खास करून गरीब लोकांक हाचो चड धपको बसला. खास करून अर्भक, ल्हान भुरगीं, आवय, जाण्टे आनी दिव्यांगांक मदत करपाचेर भर दिला. 22 जूना सावन ही मणीपूर मजत सुरू केल्ली. आतां मेरेन तीन ट्रक धाडल्यात. पांचवो ट्रक नाताळाचे जिनस घेवन 1 डिसेंबराक वतलो. तशेंच आपवावुरप्यांचो पंगड 10 नोव्हेंबर मेरेन मणिपूराक भेट दिवन निर्वासितां वांगडा दिवाळी मनयतलो, अशें www.streetprovidencegoa.com वतीन डोनाल्ड फर्नांडीस (8380097564 / 7020314848) हांणी कळीत केलां.
