उजवाड ब्युरो, ता.२१ नोव्हेंबर : सेंट पॉल इंग्लीश माध्यम हायस्कुलांतल्या विद्यार्थ्यांनी खाशेले पद्दतीन सोमारा ‘सेव अर्थ डे’ मनयलो. 6 व्या आनी 7 व्या इयत्तेच्या विद्यार्थ्यांनी राकसकोप तळे वाटारांत जमिल्लो कोयर निवळ केलो. हायस्कुलाचे प्राचार्य फादर रमेश फर्नांडीस आनी कर्मचाऱ्यांच्या मार्गदर्शना खाला सुमार ७० विद्यार्थी आनी ७ कर्मचाऱ्यांनी नितळसान मोहीम हातांत घेतली. फाटल्या हप्त्यांत पळयले तेन्ना कांय लोकांनी हांगा बाटल्यो आनी हेर वस्तुंचो कोयर केल्लो दिसलो, त्या खातीर ही स्वच्छता मोहीम हांगा राबयली.
आमी खूब काम केलें आनी सेव अर्थ डे मनयलो, अशें फादर फर्नांडिस हांणी सांगलें. तशेंच लोकांनी आनी अधिकाऱ्यांनी कोयराचेर जतनायेन वागचें, अशें आवाहन तांणी केलां.
गंगाधर आनी रेस्ट आश्रम, बेळगुंदीच्या कार्यकर्त्यांनी विद्यार्थ्यां वांगडा वावुर करून विद्यार्थ्यांक स्वच्छतेचे म्हत्व दाकोवन दिले.
हे मोहिमेक धरणाचे कोणूच अधिकारी वा कर्मचारी हाजीर नाशिल्ले.
