उजवाड ब्युरो, बेळगाव: एक धाडसी आनी येसस्वी मनशाची ही काणी. वास्तविक जिणेंतलें हें पात्र अभिनेतो राजकुमार राव हाणें पडद्याचेर चित्रीत केलां. दरेकल्याक संवसार तयार करपाक मेळपी समान संद आनी सकारात्मक कल्पना ह्या सिनेमांत सादर केल्या. तुषार हिरानंदानी हांच्या चरित्रात्मक चित्रपटांतल्या ‘श्रीकांत’ सिनेमांत राजकुमार राव, ज्योतिका आनी अलाया एफ. ह्या कलाकारांनी मुखेल भुमिका केल्यात. 10 मे दिसा प्रदर्शीत जाले उपरांत बॉक्स ऑफिसाच्या मळार तशेंच प्रेक्षकांच्या येसाच्या मळार ह्या सिनेमांन हेर जायत्या हिंदी सिनेमांक फाटीं घाला.
हो सिनेमा हांव चुकोवंक शकलो ना. राजकुमार राव आपल्या अभिनय शक्ती वरवीं प्रेक्षकां कडेन वेगवेगळ्या तरांनी भावनीक बंधन निर्माण करूंक शकता हें म्हाका खबर आशिल्लें. ह्या सिनेमांत नदरेन दिव्यांग आशिल्ल्या श्रीकांत बोल्ला ह्या वेवसायिकाची उल्लेखनीय काणी सादर केल्या. समाजीक नेमांक आनी शारिरीक आव्हानांक तोंड दिवन लेगीत श्रीकांत दरेका भारतीयाचो आदर्श जावपाच्या प्रवासाक सुरवात करता. ताचो निर्धार आनी आवड ताका ह्या जिविताच्या प्रवासांत मुखार व्हरता आनी येसस्वीपणाक कसलीच मर्यादा ना हें तो संवसाराक दाखयता. नदरेन दिव्यांग आशिल्ल्यान ताका आयआयटींत प्रवेश मेळनाशिल्ल्यान तो अमेरिकेंत वता आनी एमआयटी हे संस्थेत प्रवेश घेता. आनी मागीर एक बरो येसस्वी उद्देजक जावपाच्या हेतान भारतांत परत येता.
एक येसस्वी काणी कोणाक आवडना? आकर्शक रितीन मांडून दवरिल्ल्या बायोपिकांतल्यान खऱ्या जगाचो नव्या नदरेन अणभव घेवंक मेळटा. बॉलिवूड फिल्मांचो ग्लॅमरस मसालो कुशीक दवरून हो चरित्रात्मक चित्रपट परंपरीक मार्ग मोडून नवी दिका दिवपी थारता. दिव्यांग कोणाकूय ‘खास’ करता अशाच कल्पनेक आव्हान दिवपाक हो चित्रपट येसस्वी जाता. ताचे बदलाक हो चित्रपट प्रेक्षकांक दिव्यांग आशिल्ल्यां कडेन सामान्यपणाच्या, समानतेच्या अर्थान वागपाक सतत प्रोत्साहन दिता. “आमकां तुमची सहानुभूती नाका, आमकां समानता जाय,” हो संदेश प्रेक्षकां मेळटा.
संवसारांतल्या 20% नदरेन दिव्यांग आशिल्ले लोक भारतांत आसात हें एक खरें. पूण आमच्या भोंवतणी पळयल्यार हे लोक समाजाच्या मुखेल प्रवाहांत नात हें आमकां दिसता आनी तें खूब धक्को दिवपी आसा. श्रीकांताचो प्रवास ह्या संदेशाचें उदाहरण दिता, कारण तो अपेक्षां भायर वचून शारिरीक मर्यादा आमच्या क्षमतेक मर्यादा घालूंक शकना हें सिद्ध करता. दिव्यांग आशिल्ल्यां खातीर समाजीक क्षेत्रांत काम केल्ल्यान दिव्यांग लोकांक सहानुभूती नाका हाची म्हाका पुराय जाणविकाय आसा, पूण समाजान तांका हेरां सारकी वागणुक दिवची आनी समानतायेन वागोवचे अशें तांका दिसता. तांची जिद्द आनी कुशळटाय म्हाका सदांच अजापीत करता.
श्रीकांताचो शिक्षण वेवस्थे कडेन केल्लो संघर्श ह्या चित्रपटांत सहजतायेन आनी खरपणान दाखयला. अडचणी आसून लेगीत ताणें प्रतिश्ठीत मॅसॅच्युसेट्स इन्स्टिट्यूट ऑफ टेक्नॉलॉजी (एमआयटी) हांगा शिकपाखातीर शिश्यवृत्ती मेळयली. दिव्यांग आशिल्ल्या लोकांकय महत्वाकांक्षा आसा आनी तांकां आपले आवडीचें शिक्षण घेवपाची इत्सा आसा हें श्रीकांताच्या अभिनयान तेजस्वीपणान संवसारा मुखार हाडलां. संकश्टां आसून लेगीत शिक्षण घेवपाचो ताचो हो निर्णय सगळ्यां खातीर एक प्रेरणादायक थारता.
चड करून एक जतनाय घेवपी पालक म्हूण आमकां केन्ना केन्ना दिसता की दिव्यांग आशिल्ल्या मनशाच्या शिक्षणांत गुंतवणूक करप म्हणल्यार वेळ आनी पयसो वाया घालप कारण तांकां रोजगार आनी संद मेळची नात. पूण सनरायज कँडल्सचो धनी भावेश भाटिया सारकिल्या जायत्या व्यक्तींक पळयल्यार हे दुबाव पयस जातले. भावेश भाटियान दिश्टीहीण आनी नदरेन दिव्यांग आशिल्ल्यांकय कामाक दवरल्यात. तशेंच ट्रॅव्हल एजन्सी येसस्वीपणान चलोवपी संजय डांग आसा. तांणी स्वता खातीर एक क्षमतायेचे स्थान निर्माण केलाच तेच बरोबर दिव्यांगा खातीरय ते फायद्याचे थारला.
- गुरुप्रसाद पावसकार, राज्य दिव्यांग आयुक्त
