आंद्रु आनी रोपीना गोन्साल्वीस हांचो भोवमान करताना फा. रिचर्ड साल्डाना आनी फा. युजीबीयो फर्नांडिस.
उजवाड ब्युरो बेळगांवः वाघवडे हांगाच्या सांत आंतोनी इगर्जेचे वर्सुकी फेस्त आयतार ता. ११ फेब्रुवारी दिसा व्हडा दबाजान आनी उर्बेन मनयलें. पाटणे पॅरीश फादर रेव्ह. रिचर्ड साल्डाना हांणी मुखेल याज्ञिक म्हूण पवित्र मीस भेटयलें. तांचे सांगाता फा. स्टॅन्ली डिसोझा, फा. फ्रेडी राज, फा. विजय मेंडिथ, फा. आलेक्स डिक्रुझ, फा. राजेंद्र, फा. सायमन मस्करेन्हस, पॅरिश प्रिश्ट फा. युसेबियो फर्नांडिस आनी हेर मानेस्त पाद्रींनी फेस्ताचे मिस भेटयलें.
फा. . रिचर्ड साल्डाना हांणी आपल्या शेर्मावांत सांगलें, सांत आंतोनी जावन आसा अजापांचो- आश्चर्यांचो सांत, आमचे खातीर देवालागी मागून तो आमच्यो मागण्यो पुराय करता. आमचो देवासर्शी आशिल्लो भावार्थ तो घट्ट करता. सांता आंतोनीन केल्ली तेरा अजापा आमकां वांचूक मेळतात. चौदावे अजाप म्हज्या जिवितांत घडय म्हणून आमी ह्या सांताक विनंती करतांव. ताचेवरवी आमच्या जिवितांत जाय त्यो मिलाग्री घडिल्ल्यो आसात. भावार्थान मागल्यार आमकां नक्कीच मेळता, अशे सांगून फा. रिचर्ड हांणी सांत आंतोनीन केल्ल्या कांय अजापां विशीं भव बरी म्हायती सांगली.
सांत अंतोनीच्या इमाजीचो पुरसांव. सांत अंतोनीचे बेसांव दिताना फा. रिचर्ड साल्डाना आनी फा. युजीबीयो.
फेस्ताउपरांत गावांतल्यान सांत अंतोनीच्या इमाजीचो सोबीत पुरसांव काडलो. उपरांत कोंप्रीच्या जेवणाचे येवजण केल्ले. हे रुचीक जेवण वाघवडे हांगाचें मानेस्त आंद्रू आनी रोपिना गोन्साल्वीस फामिलीन भेतयिल्ले. .फेस्ताच्या मिसाउपरांत फा. रिचर्ड साल्डाना आनी फा. युसेबियो फर्नांडिस हांणी शॉल घालून आनी बुके दिवन तांचो भोवमान केलो. फेस्ताक व्हडा संख्येन भावार्थी हाजीर आशिल्ले.
दुसरे दीस गांवकारांचे फेस्त म्हूण सांसेबेस्तियांवाचे फेस्त मनयले. फा. मोजेस लोबो मुखेल याज्ञीक आसले. तांचे सांगाता फा. युसेबियो फर्नांडिस आनी फा. सायमन मस्करेन्हस हांणी मिस भेटयले. सासेबस्त्यांवान आमकां वरसभर खूब आधार दिलो, आमचे कश्ट निवारण केले, ह्या खातीर ताका धिनवास दिवंक आनी येवंच्या वर्सा लेगीत तो आमकां सगळ्या कश्टा आनवारांतल्यान राखू आनी सांबाळू म्हणून आमी हे गांवकारांचे फेस्त मनयतात, अशें फा. मोजेस हांणी आपल्या सोबीत शेर्मावांत सांगलें.
आंद्रु आनी रोपीना गोन्साल्वीस हांचो भोवमान करताना फा. रिचर्ड साल्डाना आनी फा. युजीबीयो फर्नांडिस.सांत अंतोनीचे बेसांव दिताना फा. रिचर्ड साल्डाना आनी फा. युजीबीयो.
