सलाम तुका सुजाता, धिनवास आनी आर्गा तुका देवा बापा

उजवाड ब्युरो: गडहिंग्लज तालुक्यातल्या हेब्बाळ-जलद्याळच्या जायत्या भुरग्यांक बरी संस्कृताय दिवन देशाचे फुडाराक बरे नागरीक घडोवपाचो अथक वावर करपी आनी शिक्षणाचे पवित्र मळार प्रामाणिकपणान वावर करपी सोज्वळ आनी निर्मळ अस्तुरी सुजाता बाबू सिक्वेरा 18 फेब्रुवारीक कार अपघातांत गंभीर जखमी जाल्ली. सुंक्रार, 1 मार्च दिसा सकाळीं 4 वाजता बेळगांवांत लेकव्ह्यु हॉस्पीटलांत उपचारा दरम्यापन तिने निमाणो श्वास घेतलो. तिच्या ह्या अकाली आनी अनपेक्षित मरणा उपरांत हेब्बाळ गांवांत आनी परिसरांत शोककळा पसरल्या. सगळो हेब्बाळ गांव- दादले,बायलो, भुरगीं शोकाकूल जाल्यात. तेच भाशेन सबंद आजरा-गडहिंग्लज आनी चंदगड परीसरातल्या क्रिस्तांव समाजांत शोक पसरला.

गांवांतली एक सोबीत, सुसंस्कृत अस्तूरी, एक उत्कृश्ट शिक्षिका एक नैतीक विचारवंत, एक सदाकाल हांसपी मुखामाळ लाभिल्ले व्यक्तिमत्व, मोगाळ काळजान सगळ्या धाकटुल्या भुरग्यांची आपूर्बायेन वास्त पुस्त करपी आवय, गावातल्या कितलेशाच पिडीत, शोषित आनी दुख्खी बायलांची मार्गदर्शक ह्या संवसाराक अंतरल्याचे दुख्ख सगळ्यांक जाला. बार्देस्कर बाई म्हूण सुजाता प्रसिद्ध आसली.
‘ आवयच्या अंगा-खांद्यार खेळपाची पिराय आशिल्ल्या धाकटुल्या भुरग्यांक संस्कारांचे डोस दिवपाखातीर, शिक्षणाची श्री गणेशा शिकोवन तांच्या फुडाराची बुन्याद घालपा खातीर गांवांतल्या भुरग्यांच्यो आवयो बिनधास्तपणान आनी विश्वासान जिच्या ताब्यात दिताल्यो, जिच्या देखरेखी खाला आपल्या भुरग्यांक आंगनवाडींत मुक्तपणान सोडटाल्योत..ती बर्देस्कर बाई….’
‘ सादें जिवीत आनी उच्च विचार करपी, पारंपारीक वेशांतली शिक्षिका, कडक शिस्त म्हळ्यार बार्देस्कर बाई….’

बार्देस्कर बाई गांवांतल्या कोणा कडेन केन्नाच वाद घाली नासली. खूब हलाखीचे दीस काडून जिवितात स्थिावल्या उपरांत आपल्या आनी गांवांतल्या भुरग्यांक बरें शिक्षण दिवपी बार्देस्कर बाई…
‘ आपल्या धर्मा वांगडाच दुसऱ्याच्या धर्माक मान-सन्मान आनी आदर दिवपी आनी आपल्या सणांसांगाता हेर धर्मियांचे उत्सवांत एकरुप जावन मनोवपी बार्देस्कर बाई..’ अशी बायल परत केन्नाच घडची ना…………. अशा उतरांनी गावांतल्या एका मानेस्त पालकान तिका अर्पण केल्ली ही आदरांजली खूब कितें सांगून वयता.
हेब्बाळ गावांत पावलेल्या जाणएकल्याच्या जिवीतांत सुजाताचो कितें ना किते कारणान संपर्क आसलो. गावांत आयलेले पाद्री, सिस्टर्स हांची तिणे आपले परीन सेवा केली. तेच भाशेन शेजाराक आशिल्ल्या सुकुर सायबिणीच्या इगर्जीची लेगीत घरकार बाबू सांगाता तिणे भरपूर सेवा केली. गावांत कोणुय येवु, सगळ्यांक ती हसतमुखान येवकार दिवन उदकाचो ग्लास आनी च्याव दिवन तांकां येवकार दिताली.
तिच्या इंतेराक क्रिस्तांव आनी ताचेपरस चड हिंदू समाजान गर्दी केल्ली. इंतेराक उशीर जालो आसलो तरी तिचे अंतीम दर्शन घेवंक जाय- तिचे मुखामळ पळोवंक जाय म्हूण हट्ट धरिल्ले गावकार पळेयल्यार काळीज पिळवटून वयताले. तिचे मुखामळ पळोवंक जमलेली गर्दी तिच्या लोकप्रियतेची साक्ष दिताली.
तिच्या अचानक वचण्यान सगळ्यांक अपार दुख्ख जाला. सर्गेस्त सुजाताक सलाम करताना आनी तिका सासणाचो विशेव मागताना घरकार बाबू सिक्वेरा, पूत आकाश आनी धूव सिमरन हांकां समेस्त उजवाड परिवार भुजवण दिता. अशी एक सोबीत भयण, आवय आनी सदाबहार व्यक्ती आमका दिल्या खातीर देवाक लेगीत धिनवास  !
– समेस्त फामिलीचे वतीन