उजवाड ब्युरो, बेळगाव: गडहिंग्लज हांगाच्या बेनिता आनी प्रकाश कर्व्हालो हांचो पूत रोहन कर्व्हालो ह्या तरणाट्या अभियंत्यान उल्लेखनीय कामगिरी करून मळबा गवसणी घालल्या . ब्रिटीश सेफ्टी काउन्सिल ही आंतरराष्ट्रीय संघटना संवसारभरांतल्या बांदकाम, उत्पादन, तेल आनी वायू प्रकल्पांचें सुरक्षेच्या मानकां खातीर मूल्यमापन करून दर ठरायता. रोहन आपल्या कंपनीच्या एका हायवे प्रकल्पाचें फुडारपण करता, जें काम खूब फामाद जालें आनी एसओपींची पुराय तपासणी करून, सुरक्षेच्या प्रोटोकॉलांची अंमलबजावणी केल्या उपरांत आनी प्रकल्पाची तपासणी केल्या उपरांत ताच्या प्रकल्पाक ब्रिटीश सुरक्षीतताय मंडळान आंतरराष्ट्रीय सुरक्षीतताय पुरस्कार 2024 विजेतो जाहीर केला.
रोहनाक हो पुरस्कार 7 जून 2024 दिसा लंडनांत (युनायटेड किंगडमांत) ताच्या संस्थे वतीन फावो जालो.
हाचे आदीं ताका असोसिएशन ऑफ चेंबर्स ऑफ कॉमर्स अँड इंडस्ट्रीज इंडिया कडल्यान 2022 वर्सा सगळ्यांत बरो प्रकल्प असो पुरस्कार मेळिल्लो आनी हालींच ताणें भारतांत पयलेच खेपेत राष्ट्रीय म्हामार्गाचेर रस्ते बांदपाक कोयर प्लास्टीक वापरपाची अंमलबजावणी केल्या.
रोहन बांदकामाच्या मळार उत्कृश्ट कामगिरी करता हाचो समेस्त उजवाड परिवाराक भोव अभिमान दिसता!
