फोडें (गोंय ) : हांगाच्या झेवेरिना आनी वायटस काल्देरा हांचो पूत रेनर काल्देरा हाणे अबॅकस कोचींग तर्फे येवजिल्ल्या सतत राष्ट्रीय मळार पयलो नंबर मेळयला. इंटरनॅशनल वर्ल्ड अबॅकस रिसर्च फावंडेशन तर्फे ही सर्त येवजिल्ली. रेनर हो हांगाच्या सेंट मेरीज हायस्कूल हांगा 6वींत आसा. फामाद बरोवपी आनी उजवाडची लेखिका, कवयित्री मिलाग्रीन डिसोझा हांचो तो नातू आसा.
उजवाड आतां 24व्या वरसांत पावल मारता ही खूब खोशेची गजाल व्हय. 23 वरसांची खडतर वाटचाल, 125 वयर खेड्यांची- शारांची भ्रमंती, 55 रुपयांची वर्गणी वो पटी घेवंक धडपड आनी उजवाडची ज्योत तेवत दवरचो प्रयत्न, घाटमाथो प्रदेशातल्या कोंकणी मनशाचे अस्तित्वा बद्दल गोय आनी सगळ्या प्रिथुमिक जाणवाय करुन दिवप आनी कोंकणी मनशाचो एकवोट घडोवन हाडून कोंकणी भास आनी संस्कृताय थिगोवन दवरप, अशे बहुरंगी- बहुढंगी आनी इतिहासिक कार्य उजवाड वोरवी साध्य जाला.
