उजवाड ब्यूरो, बेळगाव:
कर्नाटक, महाराष्ट्र आनी गोंयच्या शिक्षणीक भोंवडेर महाराष्ट्रांतल्या धुलिया जिल्ह्यांतल्या सिरपूरच्या विश्व मंडळ सेवाश्रमाच्यान आयलेल्या कर्मचाऱ्यांचेर निजामुद्दीन-वास्को गोंय एक्सप्रेसांत सांगली हांगा हल्लो केलो सोमारा राती कांय समाजकंटकांनी हल्लो केलो.
प्रवास करपी कर्मचारयांक धर्मांतरा खातीर मिशनरी व्हरतात असो दुबाव घेवन उजवे विचारसरणेच्या कार्यकर्त्यांनी ( भगव्यो संघटना) सांगली हांगा गोवा एक्स्प्रेसच्या बोगी भितर घुसून तांचेर हल्लो केलो. तातूंतले कांय जाण किरकोळ जखमी जाल्यात, जाल्यार पंगडांतल्या एका शिक्षकाक तकलेक जखम जाल्या.
तणाव आनीक वाडटलो अशें गृहीत धरून बेळगाव मंगळारा सकाळीं ह्या पंगडाक परतून सिरपूर धाडले. सिरपूरच्यान ह्या पंगडा वांगडा एक पाद्री आनी शिक्षण संस्थेचो एक सिस्टर लेगीत आसली.
16 जानेवारीक गोवा एक्सप्रेसांतल्यान बेळगाव येताना ही घडणूक घडली अशें तकलेक जखमी जाल्ल्या शिक्षक गुनीलाल पावरा (42) हांणी सांगलें.
कोल्हापूरांतलें महालक्ष्मी देवूळ आनी कनेरी मठ तसेच बेळगाव आनी गोंयांतल्या कांय देवळां आनी धर्मीक पर्यटन थळांक भेट दिवन उपरांत 20 जानेवारीक गोंयच्यान गोवा एक्सप्रेसांतल्यान परत शिरपूर वचपाची येवजण ह्या पंगडाची आशिल्ली.
“आमचो पंगड 24 दादले आनी 14 बायलो वेगवेगळ्या बोगींनी गाडयेंत आशिल्लो. रातच्या सुमार 9.30 वरांचेर गाडी सांगली स्टेशनाचेर पावली तेन्ना सुमार 15 दादले बोगी भितर घुसले आनी आमी धर्मांतर भोंवडेर आसात अशें सांगून आमकां गाळी सवून मारपेट करपाक लागले अशें गुनीलालान सांगलें.
“आमी शिक्षणीक भोंवडेर आसात अशें सांगून लेहीत ते आमकां मारत रावले आनी ते आयकुपाच्या मूडांत नाशिल्ले. तातूंतल्या एका मनशान म्हाका तकलेर हाताचो कडो मारलो त्या उपरांत म्हाका रगत येवपाक लागलें.”
20 मिनटां वयर अशें चललें आनी गाडी मिरज पावली तेन्ना पुलिसांनी बोगींत भितर सरले उपरांत हल्लेखोर पळून गेले अशें गुनीलालान सांगलें, तकलेक जाल्लीं जखम दाखोवन ताच्या शर्टाचेर रगताचे डाग ताणे दाकयले.
मंगळारा फांत्यार सुमार 1 वरांचेर बेळगाव रेल्वे स्टेशनाचेर देंवतकच कांय जाण एकटाय आयिल्ले आमका दिसले.
बेळगाव पुलिस स्टेशनाचेर वाट पळयतना आनी पंगडाची चवकशी करतना दोन तरणाट्यांनी बंसिलाल ह्या शिक्षकाक वडून मोटार सायकलीचेर व्हेले आनी धर्मांतर करपा खातीर तुमका हाडलां अशें सांगपाची धमकी दिली .
“तांणी म्हाका आमच्या गुटा पासून पासून पयस व्हेले आनी सुरीचो धाक दाकोवन म्हाका व्हिडियो करपा खातीर धर्मांतरा खातीर हाडले अशें कबूल करपाक लायलो, जें हांवें खरपणान न्हयकारलें, उपरांत तांणी म्हाका गट आशिल्ल्या सुवातेर सोडून रातच्या काळखांत ते गायब जाले, ” बंसीलालान म्हणलें.
उपरांत ह्या पंगडाक सेंट पॉल ज्युनियर कॉलेजीच्या कॅम्पसांतल्या वसतीघरांत व्हेलो. रातभर संरक्षण दिवन पुलिसांनी मंगळारा सकाळीं केएसआरटीसीची बस वेवस्था करून पंगडाक परतून सिरपूर धाडले.
शारांत फेरी अफवा पसरूक लागल्यो आनी देखून आनीक परिस्थिती हाताभायर वयची न्हय म्हणून आमी ह्या पंगडाक परत वचपाची विनंती केली अशें पुलीस सूत्रांनी सांगलें.
पूण ह्या पंगडाक परतून धाडपाक कित्या लायले तांका तांची सहल पुराय करपाक संरक्षण कित्याक दिले ना हाचेर प्रस्न उप्रासल्यात.
मजगतीं, बेल्गांवचो बिशप डेरेक फर्नांडीस हाणी ह्या मारहाण करप्यांच्या कृतीचो निशेध करून धक्को बसल्याचे म्हळा.
“आमच्या सारकिल्या लोकशाय देशांत घडूंक फावनाशिल्ली ही घडणूक आयकून म्हाका धक्को बसला. ही एक भोव वायट कृती आसा आनी हांव पुलिसांक हे प्रकरण गंभीरतायेन घेवन हल्लो करप्यां आड वागून तांकां खटलो दाखल करपाक सांगतां अशें बिशप फर्नांडीस हांणी सांगलें.
मज वेaगतीं, मंगळारा सांजवेळा उसरां व्हीएचपी आनी बजरंग दल हांणी शिक्षणीक भोंवडेच्या आयोजकांचेर कागाळ दाखल करून ही भोंवडी धर्मांतर करपाचो यत्न आशिल्लो अशी कागाळ केल्या.
पुलिसांनी ह्या प्रकरणाची चवकशी सुरू केल्या.
दरम्यान इचलकरंजीचो तराणाटो फुडारी सायमन रॉड्रिग्ज हानी कोल्हापूर पोलिसांक संपर्क करून कागलथावन एका बसची वेवस्था करून ह्या पंगडाक परते शिरपूर धाडपाची वेवस्था केली.
समाप्ती
