उजवाड ब्यूरो, बेळगांव : बेळगांव आनी शेजारच्या तालुक्यांतल्यान व्हड संख्येन किरिस्तांवांनी मणिपूराक सुरू आशिल्ल्या हिंसाचारांत शांतताये खातीर सोमार,17 दिसा ही रॅली जाली. मेथोडिस्ट इगर्जेंतल्यान सुरू जाल्ली ही रॅली आरटीओ सर्कलांतल्यान राणी चेनम्मा सर्कलांत पावली आनी थंयसर राष्ट्रपतीक दिवपाचे निवेदन वाचलें. मेथोडिस्ट इगर्जेंत आनी रानी चेनम्मा सर्कलांत रॅलीचें फुडारपण केल्लो बेळगांवचो बिशप रेव्ह डॉ डेरेक फर्नांडीस हाणी मणिपूरांतल्या हिंसाचाराचेर भर दिलो, जंय कितल्याशाच क्रिस्तांवांक मरण आयलां आनी क्रिस्तांव संस्थांची मालमत्ता सयत इगर्जी जळयल्यात.
“आमी केन्नाच हिंसाचार करनात.” पूण हिंसाचाराच्या वेळार मणिपूरांत लोकांक निर्दयपणान त्रास दिवन मारून उडयतात तें पळोवन आमकां दुख्ख जाता. जैन स्वामीजी आचार्य कामकुमार नंदी महाराजाच्या खूनाचीय आमी निशेध करतात. हे सगळे लोक आमी देवाक अर्पण करतात अशें बिशप डेरीक हाणीं फ़ुडें म्हळें.
मणिपूरांतल्या क्रिस्ताव लोकांक निवडक लक्ष्य करुन तांचेर जावपी निर्दय कृत्यांचो क्रिस्तांव लोक निर्विवादपणान निशेध करतात अशें निवेदनांत म्हणलां.
त्या उपरांत राणी चेनम्मा सर्कलांत मेणवातीच्या उजवाडात प्रार्थनाय जाली.
फादर फिलीप कुट्टी, फादर प्रमोद कुमार, पास्टर टी थॉमस, पास्टर रमेश, पास्टर चेरियन, सिस्टर मेरी, सिस्टर रोझ अब्राहम, फादर सायमन फर्नांडीस, क्लारा फर्नांडीस, लुईस रॉड्रिगीस आनी हेर हाजीर आशिल्ले.
जिल्हाधिकारी डॉ नितेश पाटीलाक निवेदन सादर केले. आनी तांणी प्रतिनिधी मंडळाक हो संदेश भारताच्या राष्ट्रपती कडेन धाडटले अशें उतर दिलें.
दोनूय वटांनी येरादारी आडाय नासतना ही रॅलीची खाशेली गजाल. किरिस्तांव लोकांची व्हड प्रमाणांत हाजीरी आसून लेगीत राणी चेनम्मा सर्कल लेगीत कसलेच ट्रॅफिक जॅम जाले ना.
