उजवाड ब्युरो, ता.२3 नोव्हेंबर : पयल्या फादर जेकब मेमोरियल इंटर स्कूल फुटबॉल सर्तीचें उक्तावण बुधवार, ता. 23 नोव्हेम्बर दिसा सकाळीं सेंट पॉल्स पीयू कॉलेजीच्या मैदानाचेर जालें. नामनेचो पत्रकार आनी बेळगाव डायोसीजीचो पीआरओ लुईस रॉड्रिग्स हांणी तीन दिसां खातीर जावपी फुटबॉल सर्तीचें उक्तावण केलें.
सेंट पॉल पीयू कॉलेजीचे प्रशासक रेव्ह. फादर स्टीव्हन आल्मेडा हांणी आपल्या उक्तावण उलोवपांत कोविडाक लागून अकाली मरण आयिल्ल्या फादर जेकब कार्वाल्होच्या गुणांचेर भर दिलो. भारतांतल्या आनी संवसारभरांतल्या तांच्या लाखांनी विद्यार्थ्यांक तो एक प्रेरणा आशिल्लो अशें फादर आल्मेडा हांणी सांगलें.
फोटो : लुईस रॉड्रिगीस दिवो पेटयतना. तशेंच फादर रोनी डिसोझा, डॉ. पद्मिनी रविंद्रन, फादर स्टीवन आल्मेडा आनी हेर.
तांकां श्रद्धांजली दितना लुईस रॉड्रिगीसान सरगेस्त फादर कर्व्हालोच्या जिवितांतल्या कांय प्रेरणादायक खीणांचेर भर दिलो. “ एक उत्तम शिक्षक, एक सक्षम प्रशासक असो फादर जेकब कार्वाल्हो ताच्या सगळ्या विद्यार्थ्यांक आदर्श जावन आसलो, ताच्या शिकोवपाची आनी सगळ्यां मेरेन पावपाची आदर्श शैली खातीर ते सदांचं यादस्तींत रावतले. आपल्या जिवितांत फादर जेकोबान समाजांतल्या सगळ्यांची सेवा केली,” अशें रॉड्रिग्स हाणी सांगले.
शाळेचयो प्राचार्या डॉ पद्मिनी रविंद्रन हाणी मानेस्तांक येवकार दिलो. सेंट पॉलचो वेवस्थापक फादर रोनी दिसोझान ऊर्जा 2022 ’ इवेंट ध्वज उबारलो.
फादर मॅथ्यू बार्देस्कर, फादर बेनिटो डिसोझा, वेगवेगळ्या शिक्षणीक संस्थांचे मुखेली, मार्गदर्शक, प्रशिक्षक, कर्मचारी आनी वेगवेगळे पंगड वांगडी हाजीर आशिल्ले.
कॉलेजिची विद्यार्थिनी प्रतिनिधी सुफिया सैयद आनी सरचिटणीस सॅम्युएल जोय हुदली हांणी उक्तावण कार्यावळीचे सूत्र संचालन केले. सेंट पॉल पीयू कॉलेजिच्या विद्यार्थ्यांनी एक सांस्कृतीक मनरिजवण नाच सादर केलो.
बेळगाव आनी हेर सुवातेवयले 21 चले आनी चलयो फुटबॉल पंगड पयल्या सन्मान मेळोवपा खातीर सर्त करतात. फायनल 25 नोव्हेंबराक जातली आनी उपरांत इनामां वांटप जातलें. तीन दिसांच्या ह्या कार्यावळींत साहित्यीक उत्सव, सांस्कृतीक कार्यावळ आनी हेर वेगवेगळीं सर्तीं जातल्यो.
उग्तावण कार्यावळ वेवस्थापक फादर रॉनी हाणी OORJA 2022 ध्वज उबारून आनी बलुनां सोडप आनी फुटबॉलाक किक मारून मुखेल सोयरो श्री लुईस रॉड्रिग्स हाणी केलें.
