लुईस रॉड्रीग्स, उजवाड ब्युरो : न्यायदेवतेच्या दोळ्यांची पट्टी आनी हातातली तलवार काडून संविधान हातांत आयला ही व्हडली खबर आसा. न्याय हो कुड्डो (ब्लाईंड) आनी हिंसक ना असो धाडशी संदेश दिवपाचे काम मानेस्त सुप्रीम कोर्टान केला. अशे तरेन कायद्याच्या मळार आता देशांत नव्या पर्वाची सुरवात जाल्या.
भारतांतल्या न्यायवेवस्थेचें खूब म्हत्वाचें प्रतीक आशिल्ल्या न्यायदेवतेच्या पुतळ्यांत व्हड बदल जाला. आतां न्यायदेवतेची दोळ्याची काळी पट्टी काडून उडयल्या. तशेंच, पयलीं हातांत आशिल्ली तलवार लेगीत काडून संविधान न्यायदेवतेच्या हातांत दिसता. ही नवी मूर्त सुप्रीम कोर्टाच्या वाचनालयाच्या परिसरात बसयल्या. मूर्तीच्या हातांतली तागडी मात तशीच आसा. हाचो अर्थ न्या मागपी दोनुय बाजूंक न्या समान जोखता असो आसा. तेच भाशेन ही ब्रिटीशा काळांतल्या कांय परंपरांक लेगीत ह्या वोरवीं तिलांजली दिल्या.
कांय दिसां उपरांत निवृत्त जावपी आनी आपल्या धाडशी निर्णयां खातीर फामाद जाल्ले सुप्रीम कोर्टाचे मुखेल न्यायाधीश व्ही.वाय. चंद्रचूड हाणी न्यायदेवता वो न्याय संस्था तलवारीन न्हय तर संविधानाच्या आदाराचेर उगट्या दोळ्यांनी काम करता हें दाखोवपाचो यत्न हे पुतळ्यांतल्यान केला.
