नंदगडच्या दोंगरावयल्या चमत्कारी कुरसाकडेन पादयात्रा

उजवाड ब्युरो, बेळगाव: सुंक्रार, 22 मार्च दिसा नंदगडच्या दोंगरावयल्या चमत्कारी कुरसाच्या पवित्र कार्यावळींत वांटो घेवंक आयज हजारांनी भावार्त्यांनी भेट दिली. तातूंत बेळगांव आनी खानापूर परिसरांतल्यान 150 वयर भावार्ती पवित्र कुरसाकडेन आपले मागणे, आपल्यो आंगवणी आनी आर्गा दिवंक नंदगड दोंगराचेर पावले. ह्या पवित्र पादयात्रेचे फाटल्या 15 वयर वर्सांथावन येवजण करपी विल्सन करवालो हांणीं ह्या पादयात्रेचे येवजण केल्ले. हातूंत दादले, जाण्टे, तरणाटे, भुरगीं आनी बायलांचो आस्पाव आसलो.
बेळगांथावन ह्या पादयात्रींचो पंगड ब्रेस्तार, 21 मार्च दिसा सांत आंतोनी इगर्जींतल्यान फांत्यार भायर सरलो. कडक वताची पर्वा करी नासताना थीर भावार्तान हे सगळें पादयात्री दनपारा खानापूर तालुक्यातल्या निट्टुर पावले जयसर सांत जुझे वास इगर्ज परिसरांत तांकां विश्रांती आनी दनपारचे जेवणाची येवजण आसली.
ब्रेस्तारा सांजेर हे सगळे भावार्ती खानापूरच्या सर्वोदय हायस्कुल हांगा रावले. हांगा सर्वोदय हायस्कूलचे प्रिन्सिपल फादर नेल्सन पिंटो आनी पाद्रींनी तांचे खातीर मिसाची भेटवण केली. आयज (सुंक्रार) फांत्यार ही पादयात्रा सुरु जाली आनी सादारण 8 वाजता हे सगळे भावार्ती पादयात्री नंदगड पावले आनी ताणीं दीसभराच्या धार्मिक कार्यावळींनी आनी मिसांनी वांटो घेतलो.
ह्या पादयात्रेवोरवीं आपलो भावार्त थीर जाता आनी नंदगडच्या पवित्र कुरसाची जायती कुरपा आनी बेसांव मेळटा अशें सगळ्यांनी आपले मत उक्तायले.