उजवाड ब्युरो, बेळगाव : अंदूं मॉन्सून 31 मेक केरळांत पावतलो, असो अदमास हवामान खात्यान उक्तायला. केरळांत मॉन्सून पावतकीर तो गोंयांत पावपाक 4 दीस लागतात. गोंयांत मॉन्सून पावपाच्या तारखे विशीं सध्या तरी अदमास करप योग्य जावचे ना, अशें पणजे वेदशाळेचे मुखेली नहुश कुलकर्णी हांणी सांगलें.
हवामानात बदल जालो वा उण्या दाबाचो पट्टो तयार जालो, जाल्यार केरळ उपरांत गोंयांत मॉन्सून पावपाक उशीर जाव शकता. मॉन्सूनाची वाटचाल कशी जाता, ते पळोवन फुडलो अदमास हवामान खातें जारी करतलें, अशें तांणी सांगलें. गोंयांत मॉन्सून जुनाच्या पयल्या सप्तकात पावता. पूण हाचे पयलीं तो दोन सप्तका उपरांत सुद्धा पाविल्लो आसा.
मजगतीं, राज्यांत आडवेळो पावस सुरूच आसा. बिरेस्तारा दिसभर दमट हवामान आशिल्ले. कांय वाठारांनी गडगडाटा सयत पावसय पडलो. देखून हवामान खात्यान यलो अर्लट जारी केल्लो आसा.
अंदूं आडवेळ्या पावसाचे प्रमाण सरासरी परस 105 टक्के चड आसा. आडवेळो पावस आसलो तरी तापमान चडेच आशिल्ल्यान दीसभर उकाडो आसता. बिरेस्तारा पणजेत चडांत चड 35 अंश तापमानाची नोंद जाली. 17 आनी 18 मेक गडगट मारून पावस पडपाचो अदमास हवामान खात्यान उक्तायला.
