उजवाड ब्युरो, 11 ऑक्टोबर : तुमकां कांयच याद उरना? म्हळ्यार तुमी गजाली विसरतात वा योग्य निर्णय घेवंक शकनात? समजपाची तांकूय उणी आसा? मानसीक ताणांत रावतात जाल्यार तुमची याद दुबळी आसा. आयच्या वेगान चलपी जिणेंत मेंदवाची भलायकी सांबाळप म्हत्वाचें. खास करून तुमी अभ्यास करतात वा काम करतात जाल्यार मेंदवाची तांक वाडोवप सगळ्यांत म्हत्वाचें.
मेंदू बरोबर आसल्यार मानसीक भलायकी, याद वाडोवप, ताण उणो करप, करिअर येसस्वी जावपाक आदार जाता. तर मेंदू निरोगी दवरपाक कितें करचें वा कितें खावचें? मानसीक भलायकी तिगोवन दवरपा खातीर खाणा- जेवणाचेर खास लक्ष दिवचें पडटा. ह्या खातीर कांय भाजयो फायदेशीर थारता.
ब्रोकोली
ब्रोकोलींत जीवनसत्व के, सेलेनियम आनी अँटी- ऑक्सिडेंट आसतात, जे मानसीक भलायकी बरी दवरपाक मजत करतात. तशेंच ब्रोकोलींत ग्लूकोसिनोलेट्स भरपूर प्रमाणांत आसतात. तातूंतल्यान आयसोथियोसाइनेट्स तत्व तयार जाता. आयसोथियोसाइनेट्स ऑक्सीडेटिव ताण उणो करूं येता. हे भाजयेक लागून मेंदवाची तांकय वाडटा.
बीटा– केरोटीन आशिल्लीं भाजीपालो
बीटा कॅरोटीन हे हेर अँटी-ऑक्सिडेंट भशेन मेंदवाचें कार्य सुदारता हें जायत्या संशोधनांतल्यान स्पश्ट जालां. ह्या तत्वाक लागून याद उरपाकय सोंपे जाता. गाजर, फ्लॉवर आनी काळिंग हातूंत बीटा कॅरोटीन भरपूर प्रमाणांत आसता.
पालक
हार्वर्ड हेल्थच्या अहवाला प्रमाण पालक खावप मेंदवाक खूब फायदेशीर थारता. कारण तातूंत जीवनसत्व ए, ल्युटीन आनी केरोटीन सारकिल्ले अँटी-ऑक्सिडेंट भरपूर आसतात. पालकांत फोलेट आनी जीवनसत्व के आसता, जे मेंदवाची योग्य उदरगतीखातीर गरजेचीं आसतात.
भेंडो
भेंड्यांत पॉलीफेनॉल्स आनी जीवनसत्व बी 6 आसतात, जे मेंदवाचे भलायके खातीर फायदेशीर आसतात. ताका लागून गजाली याद दवरपाक आडखळ येयना. तशेंच भेंडेतलें लेक्टीन प्रथिन कॅन्सर पेशींची वाड जावपा पसून आडायता. तशेंच भेंडेक लागून कोलेस्टेरॉलाची पातळी सुदारता.
तोमाट
तोमाटांत लायकोपीन आसता, जें मेंदवाचे भलायके खातीर खूब फायदेशीर आसता. तोमॅटोंत लायकोपीन आनी बीटा-कॅरोटीन अशे दोन ऑल स्टार अँटी- ऑक्सिडेंट भरपूर आसतात, जे मेंदवाच्या पेशींचें लुकसाण जावपा पसून आडायता.
