उजवाड ब्युरो, बेळगाव 9 डिसेंबर : महाराष्ट्र-कर्नाटक एसटी सेवा 72 वरां परस चड काळ बंद आशिल्ली. फाटल्या कांय दिसां सावन दोनूय राज्यांनी शिमेचो वाद सुरू आसा. कन्नड रक्षा वेदिका संघटनेन बेळगांवांत निशेध केलो. ह्या वेळार महाराष्ट्रांतल्यान वचपी वाहनांचेर हल्लो करून तोडफोड जाली. हाका लागून महाराष्ट्र आनी कर्नाटक ह्या दोनूय राज्यांनी येरादारी बस सेवा रोखडीच बंद जाली. पूण तीन दिसांनी लेगीत ही सेवा सुरू जाली ना. हाका लागून प्रवाशांक खूब त्रास सोंसचे पडले. दुसरे वटेन खाजगी येरादारी संचालक अक्षरशः प्रवाशांची लुटमार करताले. आयज सकाळीं सावन बेळगांवांतल्यान कांय बशीनी महाराष्ट्रांत प्रवेश केल्यात तरी तणावाचे परिस्थितीक लागून ह्यो बशी शारांत येनात.
कर्नाटक सावन महाराष्ट्रा मेरेन आयज सकाळीं सावन बस सेवा सुरू जाल्या. सकाळीं कर्नाटकाची बस बेळगांवांतल्यान पुणेक वचपाक भायर सरल्या. पूण बेळगांव सोडल्या उपरांत खबरदारीचो उपाय म्हणून ही बस कोल्हापूर शारांत पावचे परस बायपासांतल्यान सातारा आनी उपरांत पुणे खातीर भायर सरल्या.
ह्या बाबतींत बेळगावांत घेतिल्ल्या सुरक्षे संबंदी पाेलीस कमिशनर बोर लिंगय्या हांणी अदिक म्हायती दिली.
