बेळगांव: उत्तर कर्नाटक, महाराष्ट्र, गोंय आनी भारताच्या हेर वाठारांतल्यान व्हडा संख्येन आयील्या भावार्त्यानी नंदगडच्या पवित्र खुर्साच्या पायांकडेंन गुड फ्रायडेच्या आदल्या शुंक्रारा खुर्साची वाट आनी पोवित्र मिसांत वांटो घेतलो. बेळगाव दियोसिजिन ही कार्यावळ घडोवन हाड्डिल्ली. कोविड लॉकडाऊन काळांतल्यो कोडू यादस्ती फाटी दवरून दोन वर्साउपरांत भक्तांनी देवावयली कृतज्ञता व्यक्त करुन नंदगड हांगाच्या आजापाच्या खुर्साच्या आशीर्वादाखातीर त्यांच्यो मागण्यो आनी प्रार्थना अर्पण केल्यो.
इमॅक्युलेट कन्सेप्शन इगर्ज, नंदगड हांगा सुरू जाल्ल्या कोरेजमान काळांतल्या प्रार्थना सेवेन कार्यावळीची सुरुवात जाली. देशांतल्या विविध वाठारांतल्यान आयिल्ल्या पाद्रीनी पोवीत्र मिस्सा भेटयली आनी सगळ्यांक आशीर्वादीत केले. बेळगावचे बिशप रेव्ह डॉ. डेरेक फर्नांडिस हाणी दनपारा मुखेल मिस भेटयले.
पॅरीश प्रिस्ट फादर शांतप्पा बोरकर हाणी आपल्या प्रास्ताविक प्रार्थनेंत देवाबाप्पाक धिनवास दिलो. “दयाळू देव बाप परत्यान एक फावट आमका ताच्या भोव पोवित्र कुर्पेखातीर आपयता. म्हणून आमी चिंतन आणि मनन करूया आनी खुर्सावयल्या जेजु ख्रिस्ताकडे मागणे भेटोवया,” अशे फादर बोरकर हाणी म्हळे.
आपल्या शेर्मावांत “पातका सांडून परमेश्वराक शरण वचात”, अशे बिशप डेरेक फर्नांडिस हांणी सांगले . “देवाकडे वचात आनी पातकांचे भगसने मागात. तो आमकां भगसीतलो. सेंट पीटर आणि सेंट ज्यूड हांच्या बाशेन तुमची पातका देव भगसीतलो, अशें तांणी सांगले.
स्थानिक ग्राम समितीच्या सदस्यांनी सविस्तर वेवस्था केली. दीसभर लोक व्हडा संख्येन नंडगड हांगा येताले.