उजवाड ब्युरो, खानापुर: हांगाचे फामाद अस्कारीन मिलाग सायबिणीचे फेस्त सोमार ता.2 मे दिसा दबाजान जाले. मुखेल याज्ञिक फादर जोसेफ कार्डोजो, हुबळी हे आसले. पॅरिश प्रिश्ट फा.कुस्तास लिमा आनी फा.अंतोन परेरा हांणी सगळ्यांक येवकार दिलो. पॅरिशचे डीन फा. आल्बर्ट डिसोझा हाजर आसले. मिलाग माय ही एक निश्कलंक आंकवार आसली. देवाबापान गाब्रीयेल आंजबोडव्यावोरवी धाडिल्ल्या उतराक तिने व्हय म्हळे, ती आमचे पासत आपल्या पुतालागी सदांच मागता, अशें आपल्या शेर्मावांत फादरान सांगले.
दुसरे दिसाचे मीस फादर जॉन डायस हांणी भेटयले. ते गांवचे आनी सांत सेबेस्टियनचे फेस्त म्हूण वळखतात. तो पिडेचो वैज आसा. आमची मागणी तो सदांच ऐकता, अशें फादरान सांगले.
तिसरे दिसा कुंभार वेशी वयल्या कपेलाच्या खुर्साचे फेस्त जाले. फादर अंतोनी, फा.पॅट्रिक, पॅरिश प्रिश्ट फा.कुस्तास लिमा हांणी मीस भेटयले. कृपा निवासच्या सिस्टर्सनी मिसाची सोबित मांडावळ केली. फेस्ताक हजारांनी भावार्ती हजर आसले. व्हड भक्तीभावान फेस्त मनयले.