उजवाड ब्युरो, खानापूर: खानापूर आनी गुंजी हांचे मजगतीं रेल्वे मार्गाचें डबल ट्रॅकिंग करपाचें काम झुजाच्या पांवड्यार चालू आसा आनी ह्या मार्गाचेर वेगवेगळ्या सुवातींनी आशिल्ल्या रेल्वे गेटांचेर संचारण रस्तो बांदपाचें काम जातलें. मंतुर्गा लागसार आशिल्ल्या रेल्वे गेटीचेरय लिंक रस्तो बांदतले म्हणून खानापूर-हेमडगा-अनमोद राज्य रस्तो आयज सावन 15 ऑक्टोबर मेरेन येरादारी खातीर बंद आसतलो.
हुबळी विभागाच्या उपमुख्य अभियंत्यान खानापूर भौशीक बांदकाम खात्याच्या सहाय्यक कार्यकारी अभियंत्याक पत्र धाडून ह्या मार्गाचेर येरादारी बंद करपाची सुचोवणी दिल्या.
रेल्वेच्या डबल टारिंग कामा खाला रेल्वे गेटीच्या दोनूय वटांनी दर 10 मीटर संपर्क रस्त्याक डांबर लावपाची जापसालदारकी रेल्वेची आसा. रस्तो उदरगत जाल्ल्यान आनी दोनूय वटांनी येरादारी आडमेळीं बांदिल्ल्यान येरादारींत व्यत्यय येवची न्हय म्हणून खानापूर-अनमोद रस्तो बंद करपाची सुचोवणी केल्या.
अनमोडे रस्तो बंद जाल्ल्यान मंतुर्गा, नेरसा, अशोकनगर, शिरोली, डोंगरगांव, हेमडगा हांगाच्या रहिवाशांनी असोगा वरवीं प्रवास करचो पडटलो. ह्याच मार्गाचेर खानापूर-अनमोड बस सेवाय सुरू केल्या. तशेंच अनमोडे मार्गान गोंयांत वचपी गाडयो रामनगरांतल्यान वळयल्यात.