उजवाड ब्युरो, नोव्हेंबर १३ : कर्नाटक क्रिस्तांव उदरगत मंडळाचो वांगडी आनी आदलो आमदार आयवन डिसोझान सगळ्या संप्रदायांतल्या क्रिस्तांवांक कर्नाटक सरकारान सुरू केल्ल्या येवजण्यांचो फायदो घेवपाक उलो मारला . फातिमा कॅथेड्रलाच्या नाझरेथ हॉलांत जमल्ल्या धर्मीक मुखेल्यांक आनी क्रिस्तांव फुडाऱ्यांक तो संबोधीत करतालो. बिशप डेरेक फर्नांडीस हांणी हे बसकेचें अध्यक्षपद सांबाळ्ळें.
कर्नाटकाचे मुख्यमंत्री सिद्दरामैया हाच्या फुडारपणाखाल कर्नाटक सरकार जात आनी पंथ हांचो विचार करिनासतना लोकांची एकंदर उदरगती खातीर कटिबद्ध आसा. कम्युनिटी हॉल बांदपाक, इगर्जी दुरुस्त करपाक आदी निधी सरकारान उपलब्ध केला, सगळ्या क्रिस्तांवांनी मुखार येवन ताचो फायदो घेवचो अशें डिसोझान आवाहन केलें. सादर केल्ल्या वेगवेगळ्या प्रस्तावां खातीर मंजूर केल्लो निधी रोखडोच मंजुर जातलो अशेंय तांणी आश्वासन दिलें. मुख्यमंत्री सिद्दरामैय्यान आश्वासन दिल्ल्या प्रमाण क्रिस्तांव विकास म्हामंडळ स्थापन जाले उपरांत आनीक निधी दितले अशेंय तांणी सांगलें.
ह्या संदर्भार उलयतना बिशप डेरेक फर्नांडीस हांणी मुख्यमंत्र्याचे उपकार मानले आनी लोकां मेरेन पावपाच्या श्री द्सोझा हांणी केल्ल्या वावराची तोखणाय केली. तशेंच अल्पसंख्यांक आनी समाजांतल्या हेर मागास वर्गांच्या उदरगतीचे दिकेन वेगवेगळीं उदरगत येवजण्यो हातांत घेतिल्ल्यान कर्नाटक सरकाराक परबीं दिली.
जनसंपर्क सचीव लुईस रॉड्रिगीस, अल्पसंख्यांक अधिकारी श्रीशैल हिरेमठ हांणीय ह्या वेळार विचार उक्तायले. वेगवेगळ्या इगर्जांनी सादर केल्ले प्रस्तावय हे बसके वेळार घेतले. रेव्ह फादर युसेबियो फर्नांडीस, फादर जॅक मेनेझीस , फादर विजय मेंडिथ, रेव्ह एबेन्जर काराबन्नावर, पाद्री आनी पास्टर ह्या सभा खातीर हाजर आसले.