बेळगावात इगर्ज़ीच्या परिसरात घुसून तलवार हल्लो करपी व्यक्तीक अटक

उजवाड ब्युरो, 14 डिसेंबर: इगर्जीच्या आवारात  घुसून तलवार हल्लो केल्ल्या व्यक्तीक बेळगांव पुलिसांनी अटक केल्या. महम्मद निजाम फुलवाले (पिराय 22) रावपी वैभव नगर झोपडपट्टी अशें ताचे नाव आसा.

ता. 11 डिसेंबर दिसा भर दिसाचे एका धक्कादायक घटनेत एका व्यक्तीन इगर्जीच्या फादरवयर तलवारीन हल्लो करचो यत्न केल्लो. सेंट जोसेफ द वर्कर इगर्ज, बॉक्साईट रोड हांगाचे पॅरीश प्रिश्ट फादर फ्रान्सिस डिसोझा हांचेवयर तलवारीन हल्लो करचो यत्न जाल्लो.

तलवार हातांत घेवन एका व्यक्तीन कंपाऊंडच्या भिंतीवयल्यान उडी मारिल्ली आनी इगर्जीच्या फाटल्या बाजूक असलल्या निवासस्थानाच्या पयल्या मजल्यावयर दनपारा 3.40 च्या सुमाराक प्रवेश केल्लो. तो खोलिभीतर लिपून बशिल्लो आनी ताणे फादर फ्रान्सिसवयर हल्लो करचो यत्न केल्लो.
आयतारा मध्यानीक पुलिसांनी ताका अटक केली. एपीएमसीचे पुलीस इन्स्पेक्टर मंजुनाथ हिरेमठ, पीएसआय मंजुनाथ भजंत्री आनी तांच्या सहकार्यानी ही कारवाय केली.