उजवाड ब्युरो, बेळगांव: हेब्बाळ- जळद्याळ (ता.गडहिंग्लज) हांगाचे कोंकणी सुपुत सुप्रसिद्ध विज्ञानिक डॉ.मार्शल मस्करेंज हांका भारत सरकारान तांच्या विज्ञानिक शोधाखातीर पेटंट मंजूर केलो. SYSTEM FOR MEASURING SKY LUMINANCE
AND A METHOD THEREOF
ह्या विशयावयल्या तांच्या संशोधनाक भारत सरकारान तांच्या नावाचेर पेटंट जाहीर केला.
जर कुणी नवीन शोध लायलो आनी त्या संशोधकाच्या शोधाक सरकारान अधिकृत मान्यताय दिली जाल्यार तो संबंधित शोध संबंधित व्यक्तीच्या नावावयर नोंद जाता. हो शोध नवीन आसता आनी ह्या आदी ह्या विशयावयर कोणीच शोध लायिल्लो नासता. आपल्या नवीन शोधाबद्दल सगळे पुरावे सरकाराक सादर करचे पडतात आनी सरकारचे वैज्ञानिक ह्याबद्दल सगळ्या थरावयल्यान खूब अभ्यास करून संशोधकाक पेटंट मंजूर करतात. डॉ.मार्शल हाणें आपलो शोध सादर केल्यार 6 वर्साउपरांत भारत सरकारान ताच्या शोधाक पेटंट अधिनियम 1970 नुसार पेटंट मंजूर केला.
डॉ.मार्शल हो हेब्बाळच्या आशा आनी सर्गेस्त शाहू मस्करेंज हांचो सुपुत, सरोळीची अंजेलीन फिलिप बारदेस्कर हांचो नातू आनी उजवाडचे उपसंपादक मिनीन आनी सिसिलिया गोन्साल्वीस हांचो जांवय जावन आसा. तो आनी ताची घरकान्न शिल्पा सद्या बेल्जियम, युरोप हांगा कार्यरत आसात.
मार्शल हाच्या ह्या अलौकीक कार्यावरवी घाटमाथ्यावयल्या कोंकणी भाशिकांच्या शिरपेचांत अभिमानाचो तुरो प्राप्त जाला.
उजवाड परिवार डॉ. मार्शल हांचे अभिनंदन करता आनी तांकां परबी भेटयता.
