उजवाड ब्युरो, पणजी: सांत फ्रान्सिस शावेर गोंयचो सायब जावपाकुच शकना अशे विधान करपी गोयांतल्या हिंदू रक्षा म्हाआघाडी हे संघटनेचे राजनिमंत्रक सुभाष वेलींगकार हांचेर काँग्रेस आनी भाजपांतल्या क्रिस्ती आमदारांनी खर टिका केल्या. गोयांतलो धर्मिक एकवट इबाडप्यांचेर बेगोबेग कारवाय करपाची मागणी विरोधी पक्ष फुडारी मायकल लोबो हांणी मुख्यमंत्र्याकडे केल्या.
गोंयचो सायब म्हूण फामाद आशिल्ल्या सांत फ्रान्सिस शावेर हांका क्रिस्ती समुदायासयत हिंदू धर्मीय लेगित मानतात ताका लागुनच दर वर्सा देश-विदेशांतले लाखांनी भाविक तांच्या दर्शनाखातीर येतात. वेलींगकार हांणी ह्या भाविकांक दुखयल्यात, तांचो अपमान केला ते खातीर तांचेर कारवाय जावप गरजेचे. अशे मत मायकल लोबो हांणी उक्तायला.
भगवान परशुराम होच गोंयचो राखणकर्तो. सांत फ्रान्सिस शावेर हो केन्नाच गोंयचो सायब जावपाक शकना. गोयांत इक्वीजिशन ही राक्षसी यंत्रणा हाडपाक सांत फ्रान्सिस शावेर हेच जापसालदार आशिल्ले अशेंयी वेलींगकार हाणीं म्हळा. विरोधी पक्ष फुडारी मायकल लोबो, हळदोणे मतदार संघाचे आमदार कार्लुस फेरेरा आदले आमदार ग्लेन टिकलो हांणीयी ह्या वादग्रस्त विधानापसत सुभाष वेलींगनाचेर खर टिका केल्या.
