उजवाड ब्युरो, गोंय: फकत गोयांतूच न्हय तर सगळ्या संवसारांत फामाद आशिल्ले गोंयच्या सायबाचें फेस्त आयज(3 डिसेंबर) पोरणे गोंय हांगा जाले. अंदमान आनी निकोबारचे बिशप मानेस्त आलेक्स डायस मुखेल याज्ञिक आशिल्ले. तांचे सांगाता गोंयचे बिशप मानेस्त फिलीप नेरी फेरांव, सिंधुदुर्गचे बिशप मानेस्त ऑल्वीन बरेटो आनी हेर पाद्रींनी फेस्ताचे मुखेल पवित्र मीस भेटयले.
शेरमावांत बिशप आलेक्स डायस हाणीं म्हळें, मदर तेरेजा म्हणटाली, लोकांक भूक लागल्या मोगाची, जेवणा-खाणाची न्हय. संवसार भुकेला आनी ताणेला जेजूक आनी ताच्या शिकवणेंक. लोकांक मोग आनी जेजूची शिकवण दिवंक जाय. सांत फ्रान्सिस शावेरान हेच केले. जेजूचे शुभवर्तमान परगटूंक ताची सपना आनी उसके आसले. आमचे पापी जिवित बदलूंक आमी सांत फ्रान्सिस शावेराकडे मागुया, अशें तांणी सांगले.
मिसाखातीर व्हड माटव घातिल्लो. आदले दिसा उटांगराचो पावस जाल्ल्यान माटवांत मीस जावंची भिरांत आसली. पूण 3 डिसेंबराक पावस उणो जाल्ल्यान माटवांत मीस जाले. कोविडाची भिरांत आनी पावस हाका लागून भावार्ती थोडे उण्या संख्येन हजर आसले.