उजवाड ब्युरो, बेळगांव : वरिश्ठ जेज्वीट पाद्री फादर पेद्रु रॉड्रीग्स हांची गोंय जेज्वीट गोंय प्रांताचे (प्रॉव्हिन्स) प्रॉव्हिन्शियल म्हूण नेमणूक जाल्या. तांच्या नेमणुकीची खबर प्रॉव्हिन्शियल फादर रोलंड कोयलो हाणीं एका पत्रावोरवीं दिल्या. सर्गेस नेपोलियन रॉड्रिग्स आनी अनातिल्डा रॉड्रिग्स हांचो पूत जावन आशिल्लो फादर पेद्रु हळदण (आल्दोना), बार्देश, गोंयचो. ताणें आल्दोनाच्या सेंट थॉमस हायस्कुलांत शिक्षण घेतलें, उपरांत म्हाशेच्या सेंट झेवियर कॉलेजींतल्यान बी.ए. आनी निर्मला इन्स्टिट्यूट ऑफ एज्युकेशन (गोंय विद्यापीठ) हांगा बी.एड. पदवी मेळयली. फादर पेद्रून कर्नाटक विद्यापिठाची इतिहास आनी पुरातत्वशास्त्रांतली कलेची पदव्युत्तर पदवी आनी शिक्षणांत पदव्युत्तर पदवी मेळयली. पाद्रीपणाच्या घडणुकेचो एक भाग म्हूण ताणीं पुण्यांत तत्वगिन्यानांतली पदवी मेळयली. त्या उपरांत दिल्लीच्या विद्याज्योती कॉलेजींतल्यान धर्मशास्त्रांतली पदवी पुराय केली. 2002 वर्सा तांची पाद्रीपणाची ओड्द जाली.
शैक्षणिक मळार ताणी खूब मोलादिक वावर केला. म्हापशेच्या सेंट ब्रिटो हायस्कुलाचो व्हाईस प्रिन्सिपल, उपरांत लोयोला हायस्कुल, मडगांवचो व्हा.प्रिन्सिपल आनी त्या उपरांत बेळगांवच्या सेंट पॉल्स हायस्कुल आनी उच्च माध्यमीक, आनी लोयोला उच्च माध्यमीक शाळेचो प्राचार्य म्हणून काम केलां .मडगावांतल्या सांत लोयोला उच्च माध्यमीक शाळा आनी बेळगांवच्या सेंट पॉल प्री-युनिव्हर्सिटी कॉलेज सुरू करपाक तांचो म्हत्वाचो वांटो आशिल्लो. स्पेनांतल्या प्रोक्युरेटर्स कॉम्ग्रेगेशनचो वांगडी म्हूण गोंय जेझुईत प्रांताचें प्रतिनिधित्व केलें आनी सध्या गोंयच्या राया हांगाच्या पेद्रू आरुपे इन्स्टिट्यूटचो सुपीरियर म्हणून वावर करतात.
फादर पेद्रू रॉड्रीग्स हांची नेमणुक सोसायटी ऑफ जेजूच्या सुपीरियर जनरल रेव्ह. फा. आर्तुरो सोसा एस.जे. हाणीं , 04 एप्रील 2024 दिसा फादर पेद्रू रॉड्रीग्स हांची गोंय प्रॉव्हिन्सचे नवे प्रॉव्हिन्शियल म्हूण नेमणूक केली. हें नवें मिशन सुरू करताना आमी दे वाच्या आशीर्वादा खातीर आमची काळजा थावन इत्सा करतात. रोलंड कोयलो, एस.जे. उजवाड परिवार लेगीत फादर पेद्रु रॉड्रीग्स हांचे अभिनंदन करून तांच्या फुडल्या वाटचाली खातीर तांकां परबीं दिता.,
