अमेरिकी राष्ट्राध्यक्ष ज्यो बायडेन हांचे वांगडा फा.निकोलस डायस.
उजवाड ब्युरो, पणजी : दिल्ली जाल्ले जी 20 परिशदे वेळार अमेरिकी राष्ट्राध्यक्ष ज्यो बायडेन हांचे सयत मीस (प्रार्थना) करपाची संद गोंयचो सुपूत फादर निकोलस डायस हांकां मेळ्ळी. दिल्लीचे चर्चीन बाणावलेचे फा.निकोलस हांकां होली कम्युनियन सेवा करपा खातीर निमंत्रण दिल्लें. हे सेवे खाला तांकां ज्यो बायडेन हांचे सयत दिल्लीच्या हॉटेलांत मीस करपाची संद मेळ्ळी.
गोंयचें खाशेलपण आशिल्ली बेबिंका डीश फा. निकोलस हांणी ज्यो बायडेन हांकां भेट दिली. हाच्या बदल्यात ज्यो बायडेन हांणी ‘द प्रेसीडेंटस सील नंबर 261 ‘ फादराक भेट दिली. कांय वेंचीक लोकांकूच अमेरिकी राष्ट्राध्यक्ष ही भेट दिता. दिल्लीच्या मौर्य शेरेटन हॉटेलांत मीस तशेंच दोगांची भेट जाली. फा.निकोलस हांणी ही म्हायती दिली.
दिल्लींत जी 20 परिशदेची कार्यावळ जाली. हे परिशदेक प्रधानमंत्री नरेंद्र मोदी हांचे सयत वांगडी देशांचे मुखेली हाजीर आशिल्ले. अमेरिकेचे राष्ट्राध्यक्ष ज्यो बायडेन हे लेगीत परिशदेंत वांटो घेवपाक आयिल्ले. परिशदे पयली शेनवारा सकाळीं 9 वरांचेर दिल्लींत मौर्य शेरेटोन हॉटेलांत हें मीस जालें.
परिशदे पयलीं अमेरिकी दुतावासा कडल्यान आपल्याक कॉल आयलो. अमेरिकी राष्ट्राध्यक्षांक खासगी मीस हॉटेलांत करपाचें आसा. ह्या मीसा खातीर आपल्याक आपोवणें आयलें. येशू ख्रिस्ताचें स्मरण करपा सयत तांणी परिशद येसस्वी जावची, म्हूण देवा कडेन मागणें केलें, अशें फा. निकोलस हांणी सांगलें.
ज्यो बायडेन दिल्लीच्या मौर्य शेरेटन हॉटेलांत राविल्ले. खाजगी पद्दतीन सकाळीं 9 ते 9.30 वरां मेरेन मीस जालें. ज्यो बायडेन हांचो खाजगी दोतोर आनी कॅथलीक शिश्टमंडळ ह्या मीसांत वांटेकार जाल्ले. अमेरिकी दुतावासान आपल्याक हाडपा-व्हरपाची आनी हेर सगळी वेवस्था केल्ली. आपूण वतना बेबंकाचें पाकीट घेवन गेल्लों. मीस जाले उपरांत आपणें राष्ट्राध्यक्षांक पाकीट भेट दिलें, अशें फा. निकोलस हांणी सांगलें.
फा. निकोलस हे दिल्ली आर्क डायसोशियन सेवेचे सचीव आसात. हे खातीर दिल्ली चर्ची कडेन आशिल्ल्या संबंदांक लागून अमेरिकी राष्ट्राध्यक्षां सयत मीस करपाची संद तांकां मेळ्ळीं.
