उजवाड ब्युरो, बेळगांव : सहकारी क्षेत्रांत अग्रणी आशिल्ल्या दैवज्ञ सहकारी बँकेचो भांगरा महोत्सव शेनवारा जातलो. 24 ऑगस्टाक सांजवेळा 4 वरांचेर आदलो केंद्रीय मंत्री सुरेश प्रभु मराठा मंदिरांत मुखेल सोयरो म्हणून हाजीर आसतलो अशें संस्थेचे चेअरमन उदय शंकर भट आनी व्हाईस चेअरमन मंजुनाथ शेट हांणी सांगलें.
मंगळारा शारांत जाल्ले पत्रकार परिशदेंत ते उलयताले. ताणीं दिल्ले म्हायती प्रमाण सुरेश गोविंद पावसकार, रमाकांत कृष्ण अनवेकर, श्रीपाद गणेश रेवणकर आनी हिराचंद विनायक रायकर ह्या चार वांगड्यांनी 1969 वर्सा फकत 75 रुपया शेअर भांडवल एकठांय करून दैवज्ञ सप्तकी निधीची स्थापणूक केली.
काळाप्रमाण निधीक कायदेशीर दर्जो दिवपाखातीर १९७४ वर्सा दैवज्ञ सहकारी पतसंस्था म्हणून संस्थेची नोंदणी जाली. फुडें १९९७ वर्सा रिझर्व्ह बँकेन हे संस्थेक दैवज्ञ सहकारी बँक म्हूण मान्यताय दिली.
गिरायकांक आनी भागधारकांक दर्जेदार सेवा दिवन बँकेन आपली खाशेली सुवात निर्माण केल्या. आर्थीक प्रगती खातीर ही बँक आतां दैवज्ञ समाजा वांगडाच हेर वेगवेगळ्या समाजांक आर्थीक मजत दिवपी एक घटमूट आधार जाल्या. पुराय देशांतली ही एकूच दैवज्ञ समाजाची बँक आसा हें विशेश. बँकेच्या प्रगतीखातीर पळोवन दैवज्ञ सहकारी बँकेक कर्नाटक सरकार आनी सहकारी खात्यान 2014 वर्सा ‘उत्कृश्ट बँक’हो पुरस्कारूय मेळ्ळो.
आदलो केंद्रीय मंत्री सुरेश प्रभु मुखेल सोयरो आनी आमदार अभय पाटील मानाचो सोयरो, तर सहकारी विभागाचे संयुक्त निबंधक डॉ. सुरेश गौडा, दैवज्ञ सेवा संघ अध्यक्ष दयानंद नेतलकर आदी मानेस्त हाजीर आसतले.
ह्या सुवाळ्याच्या निमतान दैवज्ञ सहकारी बँकेच्या आदल्या संचालकांचोय अभिनंदन सुवाळो जातलो. तशेंच खाशेली यादस्तीकय ह्यावेळार प्रकाशित जातली. पत्रकार परिशदेंक सुवर्ण महोत्सव समितीचे अध्यक्ष राजेश अणवेकर, सदानंद रेवणकर आनी हेर वांगडी हाजीर आशिल्ले.
बँकेचे संचालक मंडळ: जीवन वेर्णेकर श्रीमती कल्पना अणवेकर, समीर अणवेकर, जीवन डी वेर्णेकर, महाणीक अणवेकर, गणेश वेर्णेकर, श्रीमती वनिता शेट, मंजुनाथ शेट, राजेश अणवेकर, रघुनाथ शेजेकान, दयानंद नेतलकर
