उजवाड ब्युरो, हुब्बळ्ळी : धर्मांतर विरोधी कायदो जारी करचो न्हय, क्रिस्तांव समुदायावयले हल्ले थांबयात, ह्या मागण्यांखातीर हुबळी-धारवाड हांगा सोमारा शांततापूर्ण भव्य मोर्चा काडलो.युनायटेड धारवाड जिल्हा ख्रिस्त सभा आणि हुबळी-धारवाड हांगाच्या क्रिस्तांव समुदायातर्फे शारांत सोमारा शांततापूर्ण भव्य मोर्चा काडलो. गदग रोडवयल्या सेंट पीटर्स इगर्जिथावन सुरु जाल्लो हो मूकमोर्चा सर सिद्दप्पा कम्बळी मार्ग, संगोळ्ळी रायण्णा चौक, चन्नम्मा चौक मार्गावयल्यान मिनी विधानसौधवयर गेलो.
ह्या वेळार मोर्चेकऱ्यांनी काळे मास्क घालून हाताक काळ्यो रिबन बांदील्यो. हयावेळार उलयताना क्रिस्तांव नेत्यांनी सांगले की, धर्मांतराबाबत क्रिस्तांवावयर सध्या खोटे आरोप करीत आसात. जबरदस्तीन करच्या धर्मांतराक आमचो विरोध आसा. जाल्यार स्वेच्छेन दुसरो धर्म स्वीकारण्याक अधिकार घटनेने दिल्लो आसा. हाका लागून धर्मांतर विरोधी कायदो लागू करप बेकायदेशीर आसा.
खयंचो धर्म स्वीकारचो हो जाचो ताचो हक्क आसा. मात्र आ. गोळीहट्टी चंद्रशेखर आनी अन्य कांय नेत्यांनी क्रिस्तांव लोक हेर लोकांचे धर्मांतर करीत आसात असो आरोप करप चुकीचे आसा. त्यांच्या या विधानांक लागून राज्यांत क्रिस्तांव समाजावयर हल्ले वाडल्यात. हाका कोण जबाबदार? असो प्रस्न केलो.
सरकारान धर्मांतर विरोधी कायद्याचो विचार सोडून दिवंचो, क्रिस्तांव समाजावयर हल्ले केल्ल्यावयर कठोर कारवाय करची, ह्या मागण्यांचे निवेदन तहसीलदारावोरवी राज्य सरकाराक दिले. निदर्शनात होबर्ट आय. आर., दोरेराज मुनीकुंतल, अनिलकुमार पाटील, रवी मणी, सुनील कर्बी हांच्या वांगडाच शेकडो क्रिस्तांव भाव भयणीनी भाग घेतलो. मूकमोर्चा खातीर लॅमिंग्टन रस्तो थोडो काळ बंद दवरिल्लो.येरादारीची समस्या जाल्ली.
also read कर्नाटकांतल्या क्रिस्तावांकच कित्याक टार्गेट करतात