डीसीपी रोहन जगदीशाक येवकार दिवन अभिनंदन करपी शिश्टमंडळाचे वांगडी.
उजवाड.ब्यूरो, 10 ऑक्टोबर : बेळगांवच्या क्रिस्तांवांचें प्रतिनिधित्व करपी आनी बिशप रेव्ह डॉ. डेरेक फर्नांडीसाचे वतीन हालींच बेळगांव नेमणुक जाल्ले पोलीस उपायुक्त रोहन जगदीश, हाका उमेदीन येवकार दिलो. बेळगांव डायोसेसन बोर्ड ऑफ एज्युकेशन आनी समाज सेवा सचीव फादर जेरार्ड डीसिल्वा, कोषाध्यक्ष फादर (Adv) प्रमोद कुमार, सेंट झेवियर हायस्कुलाचे प्राचार्य फादर पायस सिरील ब्रॅग्स, जनसंपर्क सचीव लुईस रॉड्रिग्स आनी सल्लागार विल्यम आल्वारीस हांचो आस्पाव आशिल्ल्या पंगडान हो भोवमान केलो.
बिशप डेरेक फर्नांडीस हांचें परबीं आनी येवकार दिवपी पत्र शिश्टमंडळान ह्या तरणाट्या अधिकाऱ्याकडे सुपुर्द केलें. बिशप फर्नांडीसान देवाचो आशीर्वाद ताचेर मागून सांगलें की बेळगांव हें ह्या भागांतले एक उत्कृश्ट शार जें सांस्कृतीक आनी धर्मीक समरसताये खातीर वळखतात.
बेळगांव शार आनी तालुक्याच्या नागरिकां मदीं एकचार वाडोवपा खातीर पुलीस प्रशासनाक शक्य तितलो सहकार दिवपाचें उतर शिश्टमंडळान दिलें.
शिक्षण, भलायकी आनी समाजीक सेवा मळार क्रिस्तावानी दिलेल्या योगदानाची तोखणाय करून डी.सी.पी.जगदीश हांणी काळजा थावन उपकार मानले आनी क्रिस्तांवांक तांचे खातीर मागणें करचें अशें आवाहन केलें. तशेंच तरणाट्या विद्यार्थ्यांक प्रेरीत करपाक आनी करिअर मार्गदर्शन दिवपाक ताणें आपली सेवा अर्पण केली.
………….
