बेळगांव – खानापूर-बेळगांव रस्त्यावयर नवें बुटीक हॉटेल, लॅंडमार्क बाय पै चे मंगळारा 24 जानेवारीक दबाजान उक्तावण जालें. नामनेचे स्ट्र्क्चरल अभियंता दिलीप कुलकर्णी आनी अविनाश पोतदार हांचे हस्तुकी हे उक्तावण जाले. दोगांय मुखेल सोयऱ्यांक बाळकृष्ण आनी अशोक पै हांणी येवकार दिलो आनी तांचो भोवमान केलो. तांणी बेळगांवांत हॉटेल उद्देग सुरू केल्ल्या विश्वनाथ पै हांच्यो यादस्ती आपल्या उलोवपांत उक्तायल्यो.
ह्या वेळार नव्या हॉटेलाच्या बांदकामांत म्हत्वाची भुमिका साकारिल्ले सगळे कारागीर, कंत्राटदार आनी डिझायनरांचो बाळकृष्ण, अशोक, श्रीपाद, अजय आनी विनय पै हांणी भोवमान केलो. अभय पै हांणी संचालन केलें आनी अक्षय पै हांणी उपकार आटयले.
बेळगांव आनी वाठारांतल्यान आयिल्ल्या मानेस्तांनी ह्या वेळार पै कुटुबियांक शुभेत्सा भेटयल्यो. एक नामनायेचो यशस्वी कोंकणी वेवसायिक ह्या नात्यान उजवाड परिवारावतीन लुईस रॉड्रिग्स आनी मिनीन गोन्साल्वीस हांणी बाळकृष्ण पै हांका बुके दिवन शुभेत्सा दिल्यो.
वेणुग्राम हॉस्पिटल लागसरचें हें नवें बुटीक हॉटेल नामनेचो वास्तुशिल्पी बकुल जोशी हांणी तयार केलां. तातूंत बरी सुसज्ज रेस्टॉरंट, आधुनीक सुविधांनी सज्ज केल्ल्यो, बरी डिझायन केल्ल्यो रूम्स आनी सुट्स, मेजवानी हॉल आनी कार्यावळीं खातीर टेरेस आसा. आयच्यान हें हॉटेल पुरायपणान सुरू जाला.
विश्वनाथ पै समुहाचो संक्षीप्त इतिहास :
पै समुहाचे संस्थापक विश्वनाथ पै हे पिरायेच्या 12व्या वर्सा होन्नावस्थावन बेळगांव पावले. ताणीं आपल्या भावा सांगाता माधवाश्रम आनी सन्मित्र संमेलन ह्या ल्हानशा हॉटेलांनी वावर केलो. 1948 वर्सा ताणी आपल्या समुहाचे सुवर्ण मंदीर हे पयले हॉटेल बेळगावच्या खडेबाझारांत सुरु केले. 1952 वर्सा ताणी बेळगांवच्या सेंट्रल बस स्टॅण्ड सामकारले सुखनिवास हे हॉटेल घेतले आनी सद्याच्या फामाद पै हॉटेलची 1971 वर्सा उभारणी केली. 2004 वर्सा रामदेव हॉटेल लागी पै फूड्स सुरु केले. 2005 वर्सा किल्लो तलावा सामकार पै रिसॉर्ट्स ची स्थापना केली. 1991 वर्सा, उद्यमबाग बेळगाव हांगा व्हड प्रमाणांत ब्रेड उत्पादन करपी पै बेकरी सुरु केली.
तर तांचे उपरांत तांचो व्हडलो पूत बाळकृष्ण पै हाणीं लँडमार्क बाय पै ह्या तिसरे रेल्वे गेट लागी बुटिक हॉटेलचे उक्तावण केले.
