उजवाड ब्युरो, बेळगाव: जोयडा, बेळगांव- गोंय राष्ट्रीय महामार्गावेल्या रामनगर ते अनमोड रस्त्यार सुरु केल्ले जड येरादारीक लागून पुराय रस्त्याची अवतिकाय जावन पडल्या. रामनगर लागसारा अस्तोली पुला शेजरा पावसाक लागून परत पुराय रस्तो चिखलान माखून गेला. ताका लागून हांगच्यान यो- वच करपी वाहनां मुंगरुंक लागल्यांत. बुधवारच्यान हो रस्तो येरादारी खातीर बंद जाला. हो रस्तो सांबाळपाची जापसालदारी आशिल्ल्या राष्ट्रीय महामार्ग प्राधिकरणाच्या अधिकार्यांचे मोबायल स्विचऑफ येतात. ताका लागून जिल्लो प्रशासनान हाचे कडेन पुरायेन आडनदर केल्ल्याचें समजता.
अस्तोली पुलाच्या कुशीक सुमार ३०० मिटर रस्त्याचेर जड वाहनां गेल्ल्यान हांगची सामकी वायट अवस्था जाल्या. ह्या रस्त्याचेर पुरायेन चिखलाचें राज्य पातळ्ळां. बुधवारच्यान पावसाक परत नेट आयिल्ल्यान परत हांगा वाहनां शिरकून उरपाक लागल्यांत. हाका लागून हो रस्तो येरादारीक बंद जाल्ल्यान थळाव्यांक ताचो बरोच फटको बसला. ह्या मार्गा मजगतीं आशिल्ल्या तीनईघाट, बरडकोट, जळकट्टी, अखेती, अनमोड आनी हेर भागांत वचपी बस सेवा बंद जाल्या. ताका लागून विद्यार्थी, थळाव्यांक बरेच त्रास सोंसचे पडटात.
अस्तोलीचो राष्ट्रीय महामार्ग ब्लॉक जाल्ल्यान गोंयांत वचपी आनी येवपी बसी, हलकीं वाहनां पर्यायी मार्ग जगलबेट – असू – केसलरॉक – अनमोड मार्गाचो वापर करतात. ताका लागून ह्या रस्त्याचेरूय येरादरी कोयंडी जातना पळोवपाक मेळटा. चांदवाडी क्रॉस सावन केसलरॉक क्रॉस मेरेन हो रस्तो ल्हान आशिल्ल्यान आनी ह्या रस्त्यार फोंडकुलां पडिल्ल्यान ह्या रस्त्याचेरूय अपघात जावपाचो धोको आसा.
