उजवाड ब्युरो, बेळगाव: अखिल भारतीय कोंकणी परिशदेचें 33वें अधिवेशन 26 आनी 27 ऑक्टोबराक, रविंद्र भवन, मडगांव, गोंयांत जातलें.
दोन दिसांच्या कार्यावळीचें उक्तावण 26 ऑक्टोबराच्या सकाळीं नामनेचो लेखक आनी भास विद्वान डॉ गणेश देवी करतले. कोंकणी भाशेक शिक्षणांत ताची भुमिका आनी भास उदरगती खातीर तंत्रगिन्यानाचो वापर करपा सयत वेगवेगळ्या विशयांचेर परिशद चर्चा करतली. कर्नाटक, केरळ, महाराष्ट्र, गोंयच्यान प्रतिनिधी हाजीर रावपाचे आसात. कोंकणी भाशा मंडळाचे आदले अध्यक्ष प्रशांत नायक हे स्वागत समितीचे अध्यक्ष जाल्यार अनंत अग्नी आनी मंगलदास भाट अनुक्रमान आयोजक समितीचे कार्याध्यक्ष आनी सचीव म्हणून काम करतात.
ह्या कार्यावळी खातीर प्रतिनिधी एकठांय करपा खातीर प्रशांत नायक आनी सुदीन लोलायेकार हांचे वांगडा परिशदेचे कार्यकर्ते अध्यक्ष चेतन आचार्य हांच्या फुडारपणा खाला कर्नाटक आनी केरळ् भेट दिली.
1939 वर्सा सर्गेस्त माधव मंजुनाथ शानबाग हाणीं स्थापन केल्ली ही परिशद कोंकणी भाशेचे आनी तिच्या समाजाचे उदरगती खातीर वावर चालूच दवरता. आयोजकांनी सबंद कोंकणी उलोवप्यांक व्हड प्रमाणांत ह्या कार्यावळीक हाजीर रावपाचो उलो मारला.
पत्रकार परिशदेंत चेतन आचार्य आनी प्रशांत नायक हांणी संबोधन केलें. तशेंच डॉ कस्तूरी मोहन पाई, एच एम परनाल, टायटस नोरोन्हा, आनी मेलवीन रॉड्रिगीस हाजीर आशिल्ले.