बेळगांव, 15 : अखिल भारतीय कोंकणी परिशदेचें 33 वें अधिवेशन 26 आनी 27 ऑक्टोबराक रविंद्र भवन, मडगांव, गोंय हांगा संपन्न जातले. ह्या अधिवेशना संबंधी बसका मंगळारा पै रिसॉर्ट्स, बेळगाव हांगा जाली. अखिल भारतीय कोंकणी परिशदेचो कार्यकारी अध्यक्ष चेतन आचार्य, येवकार समितीचो अध्यक्ष प्रशांत नायक, नामनेचो कोंकणी लेखक अनंत अग्नी आनी उजवाड परिवाराचो निमंत्रक लुईस रॉड्रिगीस, ज्येश्ट पाद्री फादर नेल्सन पिंटो हांच्या मार्गदर्शनाखाल ही बसका जाली.
गोंयचो कोंकणी लेखक आनी कार्यकर्तो फादर मावझीन अतायद हांच्या अध्यक्षतेखाला जावपी अधिवेशनांत वांटो घेवपाचें आवाहन चेतन आचार्य आनी हेरांनी बेळगांव आनी शिमेवयल्या वाठारांतल्या कोंकणी उलोवप्यांक केलें.
ह्या वेळार बेळगाव भागांतल्या अधिवेशनांतल्या वांगड्यांची नोंदणीय सुरू जाली. वांगडीपणाची नोंदणी बेळगावांतल्यान आसिस आनी एप्रोजीन आल्मेडा हांची नोंदणी करून सुरू जाली.
कोंकणीच्या मुखेल प्रवाहांत बेळगांव आनी घाटमाथो वाठारांतल्या दैवज्ञ, सारस्वत, क्रिस्तांव आनी कोंकण मराठा ह्या सर्व धर्मीक समाजांनी कोंकणी भास आनी संस्कृताय खूब प्रतिकूल परिस्थितीत सांबाळून दवरल्या, ह्या समाजाची विशेष दखल घेवची अशें आवाहन लुईस रॉड्रिगीसान केलें.
ह्या बसके खातीर मिनीन गोन्साल्वीस , गिरगोल रॉड्रिगीस, आल्फ्रेड ब्रिटो, सेबास्टियन डिसोझा, आंतोन मंतेरो, पवन काकतीकर, श्रीपाद पै, आंतोन डिसूझा आनी हेर मानेस्त हाजीर आशिल्ले.
…………..
फोटो: अ. भा. कोंकणी परिशदेचे 33वे अधिवेशन नियोजन बसकेक हाजीर आशिल्ले चेतन आचार्य, प्रशांत नायक, अनंत अग्नी, लुईस रॉड्रिगीस, मिनीन गोन्साल्वीस, गिरगोल रॉड्रिगीस, आसीस आल्मेडा आनी हेर मानेस्त.
