गडिंग्लज जालो परिशदेचो स्थापना दीस
ॲड. भेंब्रे हांकां शानभाग जिणेगौरव पुरस्कार
उजवाड परिवार । प्रतिनिधी
गडहिंग्लज : पुर्तुगेज काळांत गोंय सोडून गडहिंग्लज आनी आशीकुशीच्या वाठारांनी स्थायीक जाल्ल्या कोंकणी लोकांक सोदून अ. भा. कोंकणी परिशदेन तांचे कडेन संबंद जोडपाक जाय. ते घटमूट करपाक जाय. ही काळाची गरज. घांट वाठारांतल्या गांवांतल्या कोंकणी भावा- भयणांची इतली व्हडली संख्या पळोवन मन धादोशी जालें. गोंयां पसून पयस रावन पसून तांणी आपली भास आनी संस्कृताय सांबाळून दवरल्या, अशें मत ज्ञानपीठ पुरस्कार जैतिवंत दामोदर मावजो हांणी उक्तायलें.
अस्तंत कोल्हापूरांतल्या गडिंग्लज शारांत शेनवारा अखिल भारतीय कोंकणी परिशदेचो 84 वो स्थापना दीस उजवाड परिवाराच्या जोडपालवान मनयलो त्या वेळार ते उलयताले. ह्या वाठारांतल्या मूळ गोंयच्या, तशेंच गोंयच्यान आयिल्ल्या कोंकणी भाशकांची व्हड प्रमाणांत हाजिरी आशिल्ली. ही कार्यावळ ह्या ल्हान शारांत पयलेच खेप जाल्या. हो इतिहासीक खीण. हांगाच्या सेंट अँथनी इगर्जेच्या सभाघरांत परिशदेची ही कार्यावळ जाली.
ज्ञानपीठ पुरस्कार जैतिवंत साहित्यीक दामोदर मावजो मुखेल सोयरे जाल्यार सिंधुदुर्गाचे बिशप रेव्ह. डॉ. ऑलविन बार्रेटो आनी साहित्यकार डॉ भूषण भावे मानाचे सोयरे आशिल्ले. हे कार्यावळींत लेखक, विचारवंत अॅड. उदय भेंब्रे हांकां पयलो माधव मंजुनाथ शानभाग जिणेगौरव पुरस्कार फावो जालो.
कोंकणी सांस्कृतीक राज्याची गरज
डॉ भूषण भावे हांणी आपल्या मुखेल भाशणांत गोंय, कर्नाटक, महाराष्ट्र आनी केरळ ह्या चार राज्यांनी शिंपडिल्ल्या सगळ्या कोंकणी भाशकांचें ‘सांस्कृतीक राज्य’ निर्माण करपाची म्हत्व उक्तायलें. केरळ आनी कर्नाटकांत सरकारान कोंकणीक अल्पसंख्यांक भास म्हूण मान्यताय दिवन केरळ कोंकणी अकादेमी आनी कर्नाटक कोंकणी अकादेमी स्थापन केल्या. तेच धर्तेर महाराष्ट्र सरकारान महाराष्ट्र राज्य कोंकणी अकादेमीची थापणूक करपाची गरज आसा, अशें डाॅ. भावे हांणी सांगलें.
महाराष्ट्रांतल्या आनी खासा करून गडहिंग्लजांतल्या मूळ गोंयकारांनी दिल्ल्या योगदानाची डॉ भावेन तोखणाय केली.
बिशप बार्रेट्टो हांणी प्रत्येकान कोंकणी भाशेची अस्मिताय सांबाळपाची गरज उक्तायली. ह्या वाठारांत कोंकणीची म्हत्वाची कार्यावळ घडोवन हाडपा खातीर परिशद आनी उजवाड परिवार हांणी फुडाकार घेतिल्ले खातीर तोखणाय केली.
येवकार उलोवपांत परिशदेचे उपाध्यक्ष, कवी मेल्विन राॅड्रिगीश हांणी परिशदेच्या इतिहासाची म्हायती दिली.
वयल्या घांट वाठारांतल्या कोंकणी संस्कृतायेचेर परिसंवाद जालो. साधना गट संस्थांचे संस्थापक जे बी बार्देस्कार, लेखक आल्फी मंतेरो, सामाजिक कार्यकर्ती रोजालीना बार्देस्कार- गॉडद हांणी आपले सोदनिबंद सादर केले. ज्येश्ठ पत्रकार आनी कोंकणी कार्यकर्ते लुईस रॉड्रिगीस हांणी ह्या परिसंवादाचें अध्यक्षपद सांबाळ्ळें.
कोंकणी भाशा मंडळाच्या मडगांवच्या रवींद्र केळेकार ज्ञानमंदिराच्या विद्यार्थ्यांनी केल्ल्या सांस्कृतीक कार्यावळीन कोंकणी मोगींक मोनेळ घालो. ह्या वेळार उजवाड नेमाळ्याचो एक खाशेलो अंक उजवाडाक हाडलो.
परिशदेचे वावुरपी अध्यक्ष चेतन आचार्य, सरचिटणीस गौरीश वेर्णेंकार, सहसचिव माया खरंगटे आनी हेर मानेस्त व्हड संख्येन हाजीर आशिल्ले.
