उजवाड ब्युरो, बेळगाव: जर्मनीचो तानाशहा ॲडोल्फ हिटलराची पोरणी आनी नामनेची म्हण आसा ‘ लोकांक इतले निचोडून घेयात की ते फकत जिवीत उरप म्हळ्यार आपल्या सरकारान उदरगत करपाचें सगळ्यांत व्हडलें रूप मानतल,’ फाटल्या 10 वयर वर्सांनी मळबाक पाविल्ली म्हारगाय, तुघलकी कायदे, हें सगळे पळेयल्यार मोदी सरकारान हिटलरच्या तत्वांचे अनुकरण केल्याची प्रचिती आयल्या बगार राव ना.
अर्थशास्त्रज्ञ आनी गुप्तचर विभागान हालींच जाहीर केल्ल्या लोकशाय निर्देशांकांत भारतांची परिस्थिती बिघडूंक लागल्याचे दिसून आयला. लोकशाय क्रमवारींत चड करून नागरी स्वातंत्र्यांच्या मळार भारताक देंवती कळाव लागल्याचे निरिक्षण- सर्व्हेंत निश्पन्न जाला. ताका लागून हो प्रस्न उप्रासता: भारत 2024 ची लोकसभा वेंचून आयिल्ल्या हुकुमशायी कडेन वता काय?
वेंचून आयिल्ले निरंकुश लोक लोकशाय एकाच झटकेंत उध्वस्त करिनात. आणीबाणीची औपचारीक घोशणा वा हिंसक सत्ता हातासपाची घोशणा ना. वेंचणूक नेमान जाता आनी ताका लागून जिवंत लोकशायेचो आभास मेळता. मागीर एकतर्फी विंचून आयिल्ले सरकार ल्हान ल्हान पावलांवरवीं लोकशाय उध्वस्त करता.
पयलीं वेंचून आयिल्ले सरकार निरंकुश रेफ्रींक धरपाचो यत्न करतात- हे रेफरी म्हणल्यार न्यायवेवस्था, वेंचणूक आयोग, कायदो पाळपी एजन्सी उदा: इडी, आयकर खातें, सीबीआय इ. आनी प्रसार माध्यमां अशो स्वतंत्र संस्था – हांका आपल्या पुराय अधिपत्त्याखाल घेवप वो आपल्या ताटासकयले माजर करप्. सरकारी निश्ठावान ह्यो संस्था भितर केल्यार अथवा पॅक केल्यार राजकी कार्यकारी मंडळींक जापसालदार धरपा पसून राखण मेळटा आनी मतभेदी वा विरोधकांनी पेटयिल्लो विरोधाचो उजो जबरदस्तीन पालोवपाची शक्त वाडटा.
दुसरें, वेंचून आयिल्ले लोक समाजांतल्या म्हत्वाच्या व्यक्तींक जशे की बुदवंत, संस्कृतीक प्रतिक, सिनेमा आनी खेळां नखेत्रां, वेवसायीक फुडारी हांकां आपले वटेन करून आपलो एजेंडा मुखार व्हरतात. पूण सहकार दिवपाक न्हयकार दिवपी वा सरकाराचेर प्रस्नचिन्न उबें करपी लोकांक कुशीक दवरतात, ओगी करतात वा तांची बदनामी लेगीत करतात.
तिसरें, वेंचून आयिल्ले निरंकुश लोक परस्पर सहिश्णुतायेक आडनदर करतात. उदारमतवादी लोकशाय फुलपाखातीर राजकी पक्षांनी एकामेकांक देशभक्त आनी कायदेशीर प्रतिस्पर्धी आनी विरोधक म्हूण मान्य करपाची गरज आसा. पूण व्हड संख्येन वेंचून आयिल्ले निरंकुश पक्ष विरोधी पक्षांक राष्ट्राचे दुस्मान वो ते देसद्रोही आसा अशे चित्र रंगयतात. ये देखोऽऽऽऽ पकिस्तान देश के उपर आक्रमण कर रहाऽऽऽ हैऽऽऽ अशे देशवासियांक मुखार दाखोवन फाटल्यान तांची बोल्सा खाली करतात… म्हारगाय वाडोवन. देशाक धोको आसा आनी फकत बळिश्ट फुडारीच समृध्दी आनी सुरक्षा दिवंक शकता अशें हे भुरटे लोकशायवादी हवा निर्माण करतात.
चवथी गजाल म्हळ्यार वेंचून आयिल्ल्या निरंकुश लोकांक संस्थांच्या सहनशीलतायेची चड काळजी ना. हे लोक लोक लोकशायेक आडमेळीं हाडपाखातीर लोकशायेचाचे उपेग करतात.
भारतांत ह्यो गजाली घडपाच्यो जायत्यो प्रसंग आसात. संवसारांतली सगळ्यांत व्हडली लोकशाय विडंबन म्हणल्यार कश्मीर खोऱ्यांत वो मणीपुरांत इंटरनॅट बंद करप, सीएए विरोधी निशेधांचो वापर आनी विरोध करप्यांक देशद्रोही म्हूण जाईर करप. फकत सगळे विरोधी राजकी पक्ष आनी तांचे फुडारी भ्रश्ट आनी भारताचे दुस्मान म्हणून जाएर करून सरकारी संस्थांवोरवीं तांचेर कारवाय करप. वादग्रस्त घटनात्मक दुरुस्त्यो आनी हेर कायदे – जशे की कलम 370 काडप, म्हायती हक्क कायद्यांत दुरुस्ती करप, आनी आतां सीएए !!!
लोकशायेचेर अत्त्याचार सुरु आसताना वेंचणूक आयोग, तपास एजन्सी, पुलीस अशा भारताच्या रेफ्रींच्या तटस्थतेचेर प्रस्नचिन्न उबें जालां. भारतीय सर्वोच्च न्यायालय केंद्र सरकाराक जापसालदार धरचे परस आनी घटनात्मक सुवेवस्था हांचे रक्षण करचे परस दोळे बंद करून वग्गी आसा किते ? असो प्रस्न पडटा…
बेंगळूरचे आर्चबिस्प रेव्ह. डॉ. पीटर मच्याडो हांची ही उतरा खूब शोधक, बोधक आनी खूब चिंता उत्पन्न करपी अशीच आसात. आर्चबिशप मच्याडो म्हणटात – आमी खूब कठीण काळांत रावतात. शास्त्रीय, तंत्रीक, अर्थीक आनी हेर मळार व्हडलीशी उदरगत जाली, जाका लागून देशाक संवसारांत उदयाक येवपी अर्थीक शक्त म्हूण मान्यताय मेळ्ळ्या तरी गंभीर हुस्को करपाचीं कारणां आसात.
भौसाची वाडत वचपी गरिबी, क्रोनी भांडवलदारांची वाडत वचपी मक्तेदारी, गिरेस्त आनी गरीब हांचेमदीं वाडत वचपी फरक, शिकिल्ल्या तरणाट्यांमदीं बेकारी वाडत वचप, बेकार गांवगिऱ्या गरीब लोकांचें व्हड प्रमाणांत स्थलांतर, द्वेष भाशणांचें आडमेळीं नासतना वाडप, आमच्या लाखांनी सहकारी भारतीयांक तांचे नागरीकत्व हक्क काडून घेवपाचे पद्दतशीर यत्न, मुळाव्या हक्कांचें सूक्ष्म उल्लंघन, आमच्या देशाक आनी आमच्या संविधानाक खूब आदीं सावन खाशेलपण आशिल्ल्या बहुलवादी, धर्मनिरपेक्ष आचारसंहितेचें पद्दतशीर खच्चीकरण, अल्पसंख्यांचे हक्क बेईमान तरेन पातळावप, वारंवार अल्पसंख्यांकांच्या नाजूक आरोपांचेर घरां, दुकानां आनी प्रार्थना थळांचेर बुलडोझर चलोवप, अनाथालय, वसतीघर, शिक्षणीक आनी भलायकी जतनाय संस्थांनी काम करपी लोकांक जबरदस्तीन धर्मांतर करपाच्या खोट्या आरोपांचेर मुद्दाम त्रास दिवप, हें सगळें काळजीपूर्वक तयार केल्ल्या एजेंड्यांचो एक अभिन्न भाग जाला संविधानाक आडमेळीं हाडपाखातीर, अल्पसंख्यांकांक भिरांत घालपाखातीर आनी भौसाक सशक्त करपाखातीर फूट घालपी शक्तींनी मोहीम हातांत घेतल्या.
आमचें राजकारण लोकशायवा हांचे ध्रुवीकरण जाला. आमच्या देशांतलीं लोकशाय संस्थां दुबळीं जायत आसात, संघराज्य संरचनेक अविरतपणान आडमेळीं हाडटात, प्रसार माध्यमांचो अवैध सहकार घेतला, तपास एजन्सींक सगळ्या विरोधकांक त्रास दिवपाक आनी तांकां त्रास दिवपाक प्रबळ वर्गाच्या हातांत साधनांत रुपांतरीत केल्यात.
संविधानाची मुळावी रचणूक सांबाळपाचे सगळे यत्न करपाक आमच्या राजकी फुडाऱ्यांक आवाहन करतना, आर्चबिस्पान सगळ्या नागरिकांक मतदार म्हूण नांव नोंद करचें आनी फुडल्या संसदीय वेंचणुकांनी सद्बुद्दीन मतदान करपाचें आनी आपलें हे पवित्र कर्तव्य मुक्तपणान आनी जबाबदारपणान करचें अशेंय आवाहन केलें, जाका लागून आमी घटनात्मक मुल्यां खातीर आनी गरीबांच्या उदरगती खातीर खऱ्या अर्थान प्रतिबद्ध आशिल्ल्यांकच राजकी सत्ता वापरपाक मेळटा हाची खात्री करप गरजेचे आसा, अशेय ताणीं आवाहन केला.
हालीच एका राजकी पक्षाच्यो घोषणा पळेयल्यार सर्वसामान्य मनशाचे आनी चडकरून अल्पसंख्यांखाचे काळीज भिरांतीन कांपता. अबकी बाऽऽर, 400 पाऽऽर अशो अशो घोषणा आयकून अशे दिसता की क्रूर संसदीय भोवमत वापरून लोकशायेचेर आता गधा येतली आनी “ फिर एक बार ……. सरकार ह्या घोषणेचे अबकी बाऽऽऽर, लोकशाय तडी…पाऽऽऽऽऽर” अशेच जातेले अशे दिसता. – लुईस रॉड्रीग्स, luirods@yahoo.com
