उजवाड ब्युरो, बेळगाव : म्हापशें सेंट फ्रान्सिस झेवियर हांचे विशीं आक्षेप घेवपा सारकें विधान करपी सुभाष वेलिंगकार हांकां अटक करची. तशेंच डिसेंबरांत जावपी झेवियरांचे कुडिचो प्रदर्शन सुवाळो सोंप मेरेन गोंयां भायर घालचें, अशी मागणी ख्रिस्ती भावांनी म्हापशें पुलिसांक निवेदन सादर करून केली.
वेलिंगकरांच्या विधानाक लागून आपल्यो धर्मीक भावना दुखावल्ल्याचो दावो करीत सोमारा दनपरां म्हापशें आनी हेर वाठारांतले क्रिस्तांव तशेंच हेर धर्मांतल्या भावांनी म्हापशें पुलीस स्टेशनाचेर मोर्चो हाडलो आनी उपरांत पुलीस निरीक्षकां कडेन निवेदन सादर केलें. ह्या वेळार जॉन लोबो, राहुल सिक्वेरा, मिलाग्रीस डिसोझा, मेल्विन व्हिएगस, जॉन डिसोझा, बेनी आरावझो, एडविन फोन्सेका, फ्रान्सिस फर्नांडीस, मारिया रॉड्रिगज, संजय बर्डे, सितेश मोरे, अनिल केरकार आनी हेर लोक व्हडा संख्येन हाजीर आशिल्ले.
फ्रान्सिस फर्नांडीस हांणी सांगलें, वेलिंगकार हांणी जे शब्द सेंट फ्रान्सिस झेवियर हांचे विशीं काडले ते स्विकारापा सारके नात. अशें वक्तव्य करुन ते राज्यांत धर्मीक वायटपण निर्माण करून फूट घालपाचें काम करतात. तांकां बेगोबेग अटक करची. तशेंच डिसेंबरांतल्या सेंट फ्रान्सिस झेवियरांचे कुडीच्या प्रदर्शनाचो सुवाळो जाय मेरेन तांकां गोंयच्यान भायर काडचे.
वेलिंगकरांनी जे दावे केल्यात ते चुकीचे. गोंयांत जाती मदीं वायटपण आनी गोंयची शांतिकाय भंग करपाचो हो तांचो यत्न. राज्यांतल्या हेर विशयां पसून लोकांचें लक्ष हेर कडेन वळोवपाचो हो तांचो डाव. हातूंत जमनींचें जावपी अतिक्रमण आनी भू-माफियांच्या विशया कडल्यान लक्ष काडून घेवपाचें हें कारस्थान रचिल्ले वरीं दिसता, अशें जॉन लोबो हांणी सांगलें.
