उजवाड ब्युरो, बेळगाव : क्वालिटी ॲनिमल फीड्स प्रायव्हेट लिमिटेडचे वेवस्थापकीय संचालक आनी नामनेचे उद्देजक संजीव देशपांडे हांकां इन्स्टिट्यूट ऑफ मॅनेजमेंट एज्युकेशन अँड रिसर्च (आयएमईआर) ह्या संस्थेन वर्साचो येशस्वी उद्योजक् म्हूण भोवमान केलो. शेनवारा सांजवेळा संस्थेच्या सभाघरांत जाल्ल्या आयएमईआरच्या 34व्या स्थापन दिसा तांचो हो भोवमान जालो. प्रेस्टीज युनिव्हर्सिटी इंदौरचे कुलगुरू डॉ राजेंद्र नरगुंदकर मुखेल सोयरे जाल्यार केएलएस सोसायटीचे अध्यक्ष अनंत मंडगी हांणी अध्यक्षपद सांबाळले.
डॉ. नरगुंदकारान आपल्या उलोवपांत शिक्षणाच्या मळार नवनिर्माणाची गरज उक्तायली. “ काळाच्या गरजेक प्रतिसाद म्हणून संस्था वाडटात, देखून उच्च शिक्षणाच्या मळार नवनिर्माण आनी प्राध्यापक विकास हो एक म्हत्वाचो आंग आसा,” अशें तांणी विद्यार्थ्यांक शिक्षण घेतना आपली कुशळताय वाडोवपाचो उलो मारलो.
अभिनंदनाक जाप दितना संजीव देशपांडे हांणी दर्जेदार जनावरांच्या खाद्य निर्मीती मळार ल्हानशी सुरवात कशी जाली हे विशीं म्हायती दिली. “ 60 हजार रुपयांची अल्प गुंतवणूक करून आपलो निर्मीती वेवसाय सुरू केल्ल्या क्वालिटी फीड्स कंपनीन आतां फाटल्या चार दशकांत 600 कोटी परस चड उलाढाल हुंपल्या. केएफसी, लुशियस आनी हेर मुखेल बहुराष्ट्रीय ब्रँड आपल्या कुकडां खातीर क्वालिटी ॲनिमल फीड्साचेर आदारून आसात. तशेंच खास करून कोवीड आनी हेर महामारी उपरांत सगळ्या संकश्टांक येसस्वीपणान तोंड दिवपी आमची कंपनी बेळगाव वाठारांतल्या आनी ताचे भोंवतणी 10 हजारां वयर कुटुंबांक आनी शेतकारांक आदार दिता अशें देशपांडे हांणी सांगलें.
कंपनीचो वेवस्थापकीय भागीदार अजीत लोकुर हाच्या आदार आनी मार्गदर्शनाची तोखणाय करून तांणी सांगलें की, श्री लोकुर आनी कंपनीच्या लवचीक कर्मचाऱ्यां वोरवीं आतां विस्तार करीत आसा. “ समर्पीत आनी लवचिक कामगार आनी संघटनात्मक वावराक लागून खंयचेंय आव्हान व्हडलें ना,” अशें देशपांडे हांणी भुरग्यांक उद्देजक म्हणून साहस करपाक आवाहन केले.
केएलएसचे अध्यक्ष प्रदीप सावकार, सचीव विवेक कुलकर्णी आनी एस व्ही गणाचारी, आयएमईआर गव्हर्निंग काउन्सिलाचे अध्यक्ष आर एस मुतालिक आनी आयएमईआरचे संचालक आरीफ शेख हाजीर आशिल्ले.
फोटो : संजीव देशपांडे हांकां डॉ. नरगुंदकर, अनंत मंडगी, मुतालिक, शेख आनी हेरांनी भोवमान करताना.
