दैवज्ञ बँक म्हळ्यार 24 कॅरट भांगरा सारकी आशिल्ली बँक : सुरेश प्रभू

दैवज्ञ बँक म्हळ्यार 24 कॅरट भांगरा सारकी आशिल्ली बँक : सुरेश प्रभू

दैवज्ञ सहकारी बँकेचो भांगरा सुवाळो दबाजान

उजवाड ब्युरो, लुईस रॉड्रीग्स, बेळगांव : दैवज्ञ बँक म्हळ्यार 24 कॅरट भांगरा सारकी आशिल्ली बँक आसल्याचे मत देशाचे आदले वाणिज्य तसेच नागरी उड्डाण मंत्री आनी ज्येश्ट सहकारतज्ञ सुरेश प्रभू हांणी व्यक्त केला. बेळगांवच्या दैवज्ञ सहकारी बँकेच्या भांगरा महोत्सवी सुवाळ्याचे मुखेल सोयरें म्हूण ते उलयताले. हांगाच्या मराठा मंदीर सभाघरांत शेनवार, 24 दिसा सांजे ह्या सुवाळ्याचे येवजण केल्ले. बेळगांवचे फामाद उद्देजक सचीन सबणीस तसेच नामणेचे उद्देजक आनी दैवज्ञ सेवा संघाचे अध्यक्ष दयानंद नेतळकर हे मुखेल सोयरें आसले.

कार्यावळीचे आरंभाक दैवज्ञ समाजाचे बायलांनी येवकार गायन आनी भक्ती गायन सादर केले. ते उपरांत येवकार उलोवप आनी मानेस्तांचे हस्तुकी दिवली प्रज्वलन जाले. बँकेचे चेअरमन यु आर भट हाणीं आपल्या प्रास्ताविक उलोवपांत 1969 सावन स्थापन जाल्ल्या दैवज्ञ बँकेची म्हायती दिली. 1968 वर्सा सुवर्ण नियंत्रण कायदो आयलो आनी बेळगांवांतल्या सगळ्या सुवर्णकारांच्या मनांत भय निर्माण जाले. हे वेळार समाजांतल्या कांय फुडाऱ्यांनी आर्थिक अडचणींत आशिल्ल्या आपल्या समाज बांधवांक आधार दिवच्या खातीर फकत 75 रुपयांची ल्हानशी गुंतवणुक करून फंड निर्माण केलो. कांय वर्सां उपरांत म्हळ्यार 1974 वर्सा शहापूरांतल्या एका पोरण्या घरांत दैवज्ञ सहकारी पतफेडीची स्थापना जाली आनी काळांतरान 1997 वर्सा ह्या पतफेडीचे सहकारी बँकेत रुपांतर जाले. 2014 वर्सा बँकेक कर्नाटक सरकारचो बेस्ट को-ऑपरेटिव्ह बँकेचो राज्यथरावयलो पुरस्कार दिवन गौरव केलो आने अशे तरेन 378 करोडांची उलाढाल आनी 45 हजारावयर खातेधारक, 6 शाखांवोरवीं बँकेची आर्थिक उलाढाल सुरु आसल्याचे ताणीं सांगले. ह्या वेळार ताणीं बँकेच्या सुवर्णवर्सा निमतान भागधारकांक 5% अधिक  बोनस आनी हेर येवजण्यो जाईर केल्यो. ह्या वेळार व्हा. चेअरमन मंजुनाथ शेट हांचेय उलोवप जाले.

     ह्या उपरांत सुवर्ण महोत्सवी स्मरणिकेचे सुरेश प्रभू हांचे हस्तुकी उक्तावण जाले आनी बँकेच्या वाटचालीचेर एक डोक्युमेंटरीचे सादरीकरण जाले. ह्या वेळार सुरेश प्रभू, सचीन सबणीस आनी दयानांद नेतळकर आदले संचालक आनी बँकेचे सहकारी तशेच हेर मानेस्तांचो भोवमान करण्यात आयलो. तेच भाशेन सुरेश प्रभू हांचे हस्तुकी बँकेचे चेअरमन, व्हा चेअरमन आनी संचालक हांचो सत्कार करण्यात आयलो.

ह्या वेळार कोंकणींत उलयताना दयानंद नेतळकर हाणी बँकेच्या भरभराटीचेर अभिमान व्यक्त करून संस्थापक संचालकांच्या निसुवार्थ वावराची तोखणाय केली. 1968 वर्सा सुवर्ण नियंत्रण कायद्याक लेगून कांय जाणा तर मुखार येवपी आर्थिक अडचणींक लेगून आत्महत्त्या करपाच्या लेगीत विचारांत आसले, इतली ती परिस्थिती भयाणक आसली. अशा वेळार आमच्या कांय धडाडीचे आमच्या आदल्या फुडाऱ्यांनी क्रांतीकारी निर्णय घेवन 1969 वर्सा एक फंड स्थापन करून दैवज्ञ बँकेची मुहुर्तमेढ रोयली. ङ्ग कितल्यो बँको आयल्यो आनी कितल्यो बुडल्यो, पूण दैवज्ञ बँक व्हड नेटान सुरु आसा हाचो आमकां अभिमान आसा,ङ्घ अशे म्हणून ताणीं बँकेच्या संस्थापक संचालकांक आदरांजली अर्पण केली.

उद्योजक सचीन सबणीस हाणीं सुवर्णकारी ही एक खाशेली कला आसा आनी ती थिगोवन दवरपाखातीर एक स्किल डेव्हलपमेंट सेंटर सुरु करपाची संकल्पना सादर केली. देशातली एक अग्रणी संस्था म्हणून नांवारुपाक आयलेल्या दैवज्ञ बँकेच तिचे संस्थापक संचालक, आदले आनी आताचे संचालक, सभासद, खातेदार आनी कर्मचारीवर्गाचो  भक्कम आधार लाभल्याचे ताणीं सांगले. तेच भाशेन बेळगाव एअरपोर्टच्या आयच्या भरभराटीचे श्रय ताणीं सुरेश प्रभू हांका दिले. आदलो एक उगडास सांगताना ताणीं म्हळे की सुरेश प्रभू केंद्रीय नागरी उड्डाण मंत्री आसताना अगदी निमणे घटकेक बेळगांव एअरपोर्टचो आस्पाव उड्डाण 3 येवजणेंक करून बेळगांव कारांक एक व्हडले योगदान दिल्याचे ताणीं सांगले.

     सुरेश प्रभू हांचे उलोवप : सारस्वत बँकेचे चेअरमनपद भुशयिल्ले आनी सहकार मळार नामणा जोडिल्ले अर्थतज्ञ सुरेश प्रभू हाणीं बेळगांव खातीर आपल्या काळजांत खाशेले स्थान आसा ह्या पासोत जेन्ना जेन्ना म्हाका बेळगांव येवची संद मेळटा तेन्ना ती हांव सोडीना  अशे सांगून बेळगांचे यादस्तींचेर उजाळो दिलो. तेच भाशेन ताणीं दविज्ञ बँकेच्या उदरगीतीचे लेगीत तोखणय केली. देशांत सहकारी बँकांचो आरंभ जावन 135 वयर वर्सां जाली. तातुंतल्यो कितलेशोच बँको काळाच्या ओघात लुप्त जाल्यो. पूण खूब आव्हानात्मक परिस्थितींत आयज दैवज्ञ बँकेन मेळयलेले यश खूब वाखाण्णी करपा सारके आसा अशे ताणीं सांगले. ङ्ग खंयचोय सण आसूं वो लग्नसमारंभ आसूं, आयज दैवज्ञ सोनाराकडेन घेतिल्ले भांगर खरेदी केल्या बगर आमचे कार्य पूर्ण जाईना कित्याक ते भांगर शुध्द आनी शुभ आसता असो हिंदु समाजांत परंपरागत विश्वास आसा. दैवज्ञां कडल्यान दागिने घेतल्यार फुडले जिवीत खूब बरें जातले अशी एक भावना सगळ्यां मदें प्रचलीत आसा. अशे तरेन चोख भांगर दिवपी दैवज्ञ समाजाची दैवज्ञ बँक लेगीत चोख आसा. 24   24 कॅरट भांगरा भाशेन आशिल्ली संस्था म्हळ्यार दैवज्ञ बँक,ङ्घ अशा उतरांनी सुरेश प्रभू हाणीं स्तुती केली.

मुखार उलयताना ताणीं म्हळे की आयज राश्ट्रीयकृत बँकां परस सहकारी बँको ग्राहकांक खूब लागच्यो दिसतात कित्याक समाजाच्यो आर्थिक गरजो वळखून त्या त्या समाजान स्थापन केल्ल्यो ह्यो संस्थां लोकप्रीय जातात कित्याक संस्थेचो भागध्धारक वो ग्राहक हो संचालक मंडळाचे म्हायतींतलो आसता. आर्थिक व्यवस्थेंत जगांत पांचव्या स्थानाचेर आशिल्ल्या भारत देशाची आता 3ऱ्या स्थानाचेर झेप घेवपाची तयारी सुरु असून हातूंत सहकारी संस्थांचे मोलादिक योगदान आसल्याचे ताणीं सांगले. कित्याक लघुउद्योगांक ह्यो सहकारी संस्थाच आर्थिक हातभार लायतात ज्या वोरवीं देशाची सर्वांगीण उदरगत जाता. आपली मुखारची वाटचाल करताना दैवज्ञ बँकेन एखादो तालुको दत्तक घेवन त्या तालुक्याची उदरगत सादची अशी सूचना लेगीत ताणीं केली.

ह्या कार्यावळीक आदले संचालक, तांचे सोयरें तशेच संचालक मंडळाचे वांगडी चेअरमन  उदयशंकर भट, व्हा चेअरमन मंजुनाथ शेट, राजेश अणवेकर, सदानंद रेवणकर, जीवन एस वेर्णेकर, कल्पना अणवेकर, समीर अणवेकर, जीवन डी वेर्णेकर, माणिक अणवेकर, गणेश वेरेन्कर, सौ विनीत शेट, रघुनाथ शेजेकान, दयानंद नेतलकर, रघुनाथ सुनकासलकर आनी जनरल मॅनेजर पदद्मनाभ भट तशेच समाजांतले दादले, बायलो आनी मानेस्त व्हड संख्येन हाजीर आशिल्ले.