उजवाड ब्युरो, बेळगाव: अफाट दृश्टीकोन आनी व्हड मिशन म्हूण जनसेवा करपी, एक व्हड फुडारी म्हूण देशभर आनी विदेशांत नामना जोडिल्ले डॉ. प्रभाकर कोरे आयज 1 ऑगस्टाक आपलो 77वो वाडदीस मनयतात. बेळगांवच्या नामनेच्या केएलई सोसायटीचे ते अध्यक्ष.
गोंय राज्यांत डॉ. कोरे हांणी केएलईच्या माध्यमांतल्यान शिक्षण आनी भलायकी मळार जायत्या गोंयकारांची सेवा करतना तांच्या काळजांत एक सुवात तयार केल्या. एक क्रियाशील फुडारी म्हूण डॉ. कोरे सगल्या पांवड्या वयल्या लोकां मदीं खूब फामाद आसात.
समाज कल्याणाची व्याख्या म्हणल्यार तांणी स्पर्श केल्ल्या लोकांच्या जिवितांत उजवाड हाडपी व्यक्तींनी हातांत घेतिल्लीं जापसालदारकेचीं ल्हान- ल्हान कामां. डॉ प्रभाकर कोरे हे अशीच एक व्यक्ती. बेळगांव जिल्ह्यांतल्या अंकली ह्या ल्हानशा गांवांतले आशिल्ल्यान तांणी केएलई सोसायटीचेअध्यक्ष म्हूण चार दशकांची परिवर्तनकारी भुमिका केल्या. तीन फावट राज्यसभेचे वांगडी जाल्ले डॉ कोरे हे भौसाचे फुडारी म्हूण आयज ताठ मानेन उबे आसात.
एखादे व्यक्तीच्या हातान समाजाच्या कल्याणा खातीर बारीक – सारीक कामां जायत आसतात. ती व्यक्ती आपल्या कामा वरवीं समाजाचे हीत जपता, समाजाक आपूण कितें तरी देणे आसा हे भावनेन, जापसालदारकीन काम करता. तिचो स्पर्श एखाद्याच्या जिविताक जालो जाल्यार लोकांच्या जिवितांत उजवाड येता, अशी व्यक्ती समाजाच्या नदरेन समाज कल्याण करपी थारता. डॉ. प्रभाकर कोरे हे अशीच एक व्यक्ती. जांच्या स्पर्शान कितल्याश्याच जाणांची जीण बरी जाल्या. सुखमय जाल्या.
केएलई सोसायटीचे अध्यक्ष ह्या नात्यान तांणी शिक्षण आनी भलायकेचो बरो वावर गांवांनी आनी शारांनी एक सारको केलो. केएलई वेगवेगळ्या विशयांत पूर्व- प्राथमीक ते पदव्युत्तर अभ्यासा मेरेन शिक्षण दिता. गोंयच्या खूबशा विद्यार्थ्यांक सोसायटीन चलयिल्ल्या संस्थांचो लाव जाला. केएलई उच्च शिक्षण आनी संशोधन अकादमी (केएएचईआर) आनी केएलई तंत्रगिन्यान विद्यापीठ हांचीय थापणूक डॉ. कोरे हांणी केली. संवसारीक भलायकी संघटना, नॅशनल इन्स्टिट्यूट ऑफ हेल्थ (यूएसए) आनी बिल अँड मेलिंडा गेट्स फावंडेशन हांचे वांगडा केएएचईआरच्या आंतरराष्ट्रीय सहकार्याक लागून मातृ (मॅटरनल) आनी जल्मांक येवपी भुरग्यांच्या (न्यू बॉर्न) भलायकेंत संवसारीक संशोधनाक सुवात मेळ्ळ्या.
डॉ. कोरे हांणी 1200 खाटीं सयत स्थापन केल्लें केएलई हॉस्पिटल आनी वैजकी संशोधन केंद्र आतां 2400 खाटींचें सुपर स्पेशालिटी मल्टी ऑर्गन ट्रान्सप्लांट सेंटर जालां, जें काळीज, यकृत आनी मूत्रपिंड प्रत्यारोपण शस्त्रक्रिये खातीर नामनेक पावलां. केएलईच्या भलायकी जाळांत 1700 धर्मादाय खाटीं सयत 4000 वयर खाटीं आसात जी परवडपी दरांत आधुनीक भलायकी सेवा दितात. तांच्या फुडारपणा खाला केएलई 1983 वर्सा 38 संस्थां स्थापन केल्ल्यो, आयज त्यो 310 जाल्यात आनी तातूंत 1,35,000 विद्यार्थी आनी 16,000 वयर कर्मचारी आसात.
चिकोडीतलो चिदानंद बसप्रभू कोरे सहकारी साकर कारखानो अद्ययावत करपी खास करून उत्तर कर्नाटकांतल्या ऊस उत्पादकां खातीर म्हत्वाची आशिल्ल्या सहकार चळवळीचें फुडारपण डॉ. कोरे हांणी केल्लें. तांणी सौंदत्तींत अत्याधुनीक शिवशक्ती शुगर्सची स्थापन केल्या आनी तंत्रगिन्यानाचो समावेश आनी शास्त्रीय शेती पद्दतींक चालना दिल्या.
आयसीएआर- केएलई कृशी विज्ञान केंद्र, माट्टीकोप्पा स्थापन करपांत तांणी मोलादीक योगदान दिला. तांणी स्थापन केल्ली डॉ. प्रभाकर कोरे क्रेडीट सौहार्द सहकारी लिमिटेड शेतकारांक अर्थीक मजत करता. तशेंच बायलां खातीर आघाडीची आशिल्ली बेळगांवची कॉपरेटिव्ह बँक, जिचें नांव राणी चेन्नम्मा महिला सहकारी बँक नियामित ही स्थापन करपाकूय तांचें म्हत्वाचें योगदान आसा.
डॉ. कोरे हांच्या योगदानाक लागून तांकां राष्ट्रीय आनी आंतरराष्ट्रीय विद्यापिठांतल्यान मानद डॉक्टरेट आनी कर्नाटक सरकाराचो राज्योत्सव पुरस्कार तोखणाय म्हूण मेळ्ळ्यात. पूण, नामनां मेळ्ळी, आतां विसव घेवया, अशें म्हणीनासतना तांणी जनतेचें कल्याण जावचें, तांकां दर्जेदार शिक्षण, परवडपी आधुनीक भलायकी सेवा मेळची म्हूण तांचें काम चालूच आसा. तशेंच कार्यक्षम आनी उत्पादक शेतीच्या माध्यमांतल्यान लोकांच्या जिणेंत बदल घडोवन हाडपा खातीरचो प्रवासूय तांणी चालूच दवरलां. अश्या व्यक्तीमत्वाचो आयज वाडदीस आसा. तांकां वाडदिसाचीं उर्बेभरीत परबी.
– लुईस राॅड्रिग्स