जातीय असहिष्णुतायेच्या ह्या काळांत माचीगड गावचे आदर्श उदाहरण

माचीगड गावचे रुजायरी सायबिणीचे फेस्त

लुईस रॉड्रिग्ज, उजवाड ब्युरो:  धार्मिक  असहिष्णुतायेच्या ह्या काळांत जेन्ना राजकारणी आनी धर्मकोल्ले जातीय तेढ निर्माण करतात अशा काळांत माचीगडचे हिंदु-क्रिस्तांव एकमेकाच्या सामाजिक, धार्मिक आनी घरगुती कार्यावळींनी  खूब उमेदीन वावुरतात. ही परंपरा खूब वर्सांथावन चलत आयल्या. आयच्या जातीय असहिष्णुतायेच्या ह्या काळांत जातीय तेढ निर्माण करून आपली राजकी पोळी भाजून घेवपी राजकारण्यांचे आनी धर्मकोल्ल्यांचे दोळ्यांनी अंजन घालपी हे एक जिवे उदाहरण आसा.

नंदगड पॅरीशचे सबस्टेशन आशिल्ले माचीगड नामनेच्या चमत्कारीक नंदगड कुरसाचे कांय कि.मी. अंतराचेर आशिल्ले आनी चारी वटेन सोबीत दोंगरांनी वेढलेले एक सोबीत गांव . अगदी इतिहासकाळाथावन मूळ गोंयचे आनी खूब वर्सांथावन गावांत स्थाईक जाल्ले हांगाचे कोंकणी उलोवपी कॅथलिक आनी थळावे हिंदू खूब सलोख्यान रावतात आनी एकमेकाच्या सुख:दुख्खांत एकमेकाकडेन पावतात.

हांगाच्या  रुजायरी सायबिणीचे कपेलाचे वर्सुकी फेस्त 4 मे दिसा व्हड दबाजान जाले. फादर नेल्सन पिंटो ह्या फेस्ताचे मिसाचो मुखेल याज्ञिक आसले. तेच भाशेन पॅरिश प्रीश्ट फादर शांताप्पा बोरकर, फादर जोसेफ पर्रेकार, फादर युसेबियो फर्नांडीस, फादर सायमन फर्नांडीस आनी हेर पाद्री ह्या वेळार उपस्थीत आसले. आपल्या शेर्मावांत फादर नेल्सन पिंटो हाणीं सायबिणीच्या भक्तीचेर भर दिलो. तेर्स करताना आमी पुराय मिस्तेर कित्याक भेटोवंक जाय आनी शॉर्टकट घेवचो न्हय अशें ताणीं सांगले.

सर्वधर्मसमभावाची परंपरा माचीगड गावांत थिगून :
गोंय राज्याचे शेजाराक आशिल्ल्या घाटमाथो प्रदेशांत अजून लेगीत जातीय सलोख्याचे प्रबळ अस्तित्व आसा हाचे दर्शन माचीगडच्या फेस्ता दरम्यान घडले. जातीय सलोख्याचे मॉडेल वो एक आदर्श गांव म्हणुन माचीगडचो उल्लेख जावंक येता आनी ह्या पासोत ह्या गावची प्रशंसा लेगीत सुरु आसा.
मुळावें गोंयाकार आशिल्ल्या खानापूर तालुक्यात्ल्या नंदगड लागसारचो ल्हानसो माचीगड गांव आनी थंयसर आशिल्लो ल्हानसो पूण तितलोच प्रबळ कोंकणी क्रिस्तांव समाज थळाव्या गांवकारांकडेन परिपूर्ण अशें आंतरधर्मीय संबंद दवरता.
रुजायरी सायबिणीच्या फेस्ता निमतान सायबिणीच्या इमाजीचे पुरसावांत गांवांतले हेर धर्माचे दादले, बायलो आनी भुरगीं तशेच भोवजण समाजातले लोक घागरी-तांब्यांतल्यान उदक घालून पुरसावाचो मार्ग नीतळ करताले आनी सायबिणीक हार आनी वाती भेटोवण तिचे सामकार नतमस्तक जावन तिचे वेसांव घेतालेत. हे चित्र पळोवन उपस्थीत पाद्री आनी भावार्त्यांचे काळीज सद्गदीत जाताले. तेच भाशेन गांवांतले लोक कपेलांत दवरिल्ल्या रुजायरी सायबिणीक वाती अर्पण करून तिचे सामकार नतमस्तक जाताले आनी आपली आंगवण भेटयताले.
“आमचे पूर्वज तीन शेंकडे आदीं गोंयांतल्या वेगवेगळ्या कोमुनिदादांतल्यान हांगा आयिल्ले. आमी सगळें शेती आनी फॉरेस्ट काँट्रॅक्ट घेतात. तेच भाशेन गांवांतल्या लोकां कडेन एकचारान रावतात. आमी एकामेकांच्या उत्सवांनी आनी हेर कार्यावळींनी वांटो घेतात,’’ अशें जायतीं वर्सां गांवचो सरपंच आशिल्ल्या जॅकी फर्नांडीस हाणीं सांगलें.
गांवांतले लोक दर वर्सा मराठी साहित्य संम्मेलन लेगीत घडोवन हाडटात. नामणेचे सामाजिक वावराडी आनी फामाद अभियंता पीटर डिसोझा हालीच रुप्या सुवाळो मनयिल्ल्या सुब्रमण्य साहित्य अकादमी आयोजीत ह्या संमेलनाचे अध्यक्षपद सांबाळटा.
“ माचीगडचे साहित्य संमेलन म्हळ्यार ह्या भागांतली सगळ्यांत व्हड साहित्यिक कार्यावळ जावन आसा. वेगवेगळ्या भाशांतले नामनेचे साहित्यीक ह्या संमेलनांत वांटो घेतात“ अशें ताणीं सांगले. खानापूर तालुका आनी जिल्ह्यांतल्या एसएससी विद्यार्थ्यांक फुकट खाशेले वर्ग दिवपाक वावुरपी ज्ञानवर्धिनी ह्या एनजीओचे प्रवर्तक आशिल्ल्या डिसोझा हाणीं सांगले.
गावांतलो हिंदु समाज क्रिस्तावांच्या उत्सवांत आनी किरिस्तांव हिंदुंचे कार्यावळींनी खूब उमेदीन वांटो घेतात अशें गांवचो पांडुरंग पाटील हांणी सांगलें.

  
‘’ आमी सगळे एकचारान रावतात, दोनूय समाजाच्या पूर्वजांनी तें आमचे मुखार खूब पिळग्यां सावन हो एक व्हडलो आदर्श दवरला. गांवची ही म्हान परंपरा आमी खूब मोगान आनी आत्मीयतेन मुखार व्हरतात, ’’ पाटील हाणीं सांग़ले.
अभिमानाची गजाल म्हळ्यार गोंयच्या कॅथलिकांनी तीन शेंकडेवयर खूब संघर्शपूर्ण परिस्थितींत आनी जायत्या अडथळ्यांक आनी प्रतिकूल परिस्थितींत लेगीत आपली कोंकणी भास आनी संस्कृताय थिगोवन दवरल्या.
शंबरीकडेन वाटचाल करपी गावची दमणुबाय हिच्या वाडदिसाचे आचरण : मिसा उपरांत पुणे कोंकणी क्रिस्थसभेचे आदले अध्यक्ष, ज्ञानवर्धिनी संस्थेचे प्रवर्तक पीटर डिसोझा हांची आवय दॉमिनिया उर्फ दमणुबायच्या (दमणाई) 90ंव्या वाडदिसाचे येवजण केल्ले. ह्या वेळार सगळे पाद्री आनी मानेस्तांची तांकां परबीं दिवपी उलोवपा जाली. ह्या पासोत खानापूर, गोंय, पुणे आनी हेर सुवातीं थावन आयिल्ल्या क्रिस्तावां सांगाताच हेर धर्माच्या मानेस्तांची उपस्थिती आसली. फेस्ताचे जेवण पीटर डिसोझा आनी फामिलीन फेस्ताच्या जेवणाचे येवजण केल्ले.