आंतरराश्ट्रीय बायलां दीस विशेश
आयच्या जमान्यांत सोशल मिडियाचो इतलो भडीमार सुरु आसा, कि ‘उपेगापरस दुरुपेगच चड ‘अशी परिस्थिती जाल्या. ह्या ग्रुपांचेर रिकामटेकड्यांचे आनी देड शाण्यांचे इतले फॉर्वर्ड्स येतात की ‘भीक नाका पूण सुणे आवर‘ अशे म्हणपाची वेळ आयल्या. सोशल मिडियाचो एक भाग आशिल्ल्या व्हॉट्सॅप ग्रुपांचो सुळसुळाट बेसुमार वाडला. ह्या ग्रुपांनी फुकट सल्लो दिवप्यांचो आनी मॉरल पोलिसांचो इतलो भडीमार सुरु जाला की हे ग्रुप म्हळ्यार ‘दुकन्या परस इलाज चड’ अशेच जाल्यात. जांचेकडेन भरपूर फालतु वेळ आसा, अशा कांय निकामी व्यक्तींखातीर व्हॉट्सॅप ग्रुप्स म्हळ्यार तांच्या टाईमपासचे आनी कर्तव्यदक्षतेपरस फुकट सल्लो दिवपाचे सोप्पे साधन जाला. दर ग्रुपांत अशे कांय रिकामटेकडे म्हाभाग आसात, जे हांगाथंयच्यान आयिल्ले फुकट सल्लो दिवपी फॉर्वर्डस आपल्या ग्रुपांनी फॉरवर्ड करून पोकळ नैतीकतेचे प्रदर्शन घडोवपाचो सदैव प्रयत्न करीत आसतात. थोडक्यात व्हॉट्सॅप म्हळ्यार निकम्म्यांखातीर चकाट्यो पीटत बसपी गावच्या चावडीचो कट्टो कसो जाला अशे म्हळ्यार अतिताय जावची ना. खंयचोय ग्रुप स्थापन करपाचो एक उद्देश आसता. पूण मूळ उदद्देशाथावन पयस वचपाची आनी फुके सल्ले दिवन आपले वायफळ शाणपण पाजळपी प्रवृत्तींखातीर हें खरेच एक तकली दुकीचे माध्यम जाला.
अशाच एका ग्रुपांत हाली एक फॉर्वर्ड आयिल्लो. काजार जाल्ल्या चेडवांच्या जिवीतात तिचे आवय-बापायन कशी ढवळाढवळ करची न्हय असो सल्लो दिवपी हो फॉर्वर्ड आसलो. मागीर जांका धुवो नांत अशांनी ताचेर तोंडसूख घेत आपल्या मनांतली भडास (म्हळ.. मळमळ) सार्वजनिक रितीन उक्तायली. आपल्या ह्या मतांक ताणीं बायबलचो संदर्भ दीत आपल्या मताक पुश्टी जोडली. स्वताक पुरोगामी समजपी ह्या समाजांत ‘ दिली थंयसर मेली ‘ असो विचार करपी महाभागांची उणीव ना हे लेगीत दिश्टी पडले. पूण ज्या आवय-बापायच्यो धुवो आपल्या घोवाच्या आनी सासुमाय-सासुपायच्या अत्याचाराक बळी पडटात तांची कितें अवस्था जाता आसतली हाचो एक ल्हानसो विचार करपाचे मनाचे मोठेपण दाकयचे परस हे महाभाग आपल्या मनाच्या कोतेपणाचे दर्शन घडयतात.
दरवर्सा परमाणे 8 मार्च दिसा आमी आंतरराश्ट्रीय बायलांचो दीस परते एक फावट मनयतेले. इन्व्हेस्ट इन विमीन : एक्स्लरेट प्रोग्रेस, बायलांक तांच्या समावेशान प्रेरीत करात ही अंदुच्या आंतरराश्ट्रीय बायला दिसाची थीम आसा. बायलां मदें गुंतवणुक करून 2030 मेरेन लैंगीक समानताय सादप तशेच बायलांक आनी चलयांक (चेडवांक) सबळ- सशक्त करप आनी टिकावू उद्दिश्टांचेर लक्ष केंद्रीत करप अशें अंदूच्या आंतरराश्ट्रीय बायला दिसाचो उद्देश आसा. पूण आमच्या पुरुशप्रधान समाजांतल्या कांय म्हाभागांची मानसीकताय पळेयल्यार बायलांचे संरक्षण, सबलीकरण, समान हक्क ह्यो सगळ्यो फकत दिखावुपणाच्यो आनी भाशणा-घोशणां खातीर आशिल्ल्यो गजाली आसात अशेच दिसता. समतोल विचार करी नासताना कांय कायदेशीर संदर्भ दीत ‘कितेंय जाले तरी बायलांनी आपले तोंड बंद करून तांचेर जावपी अन्याय-अत्त्याचार निमुटपणान सहन करीत रावुंक जाय आनी आपल्या आवय-बापायचे नाव पर्जळीत करूंक जाय ‘ अशेच ह्या महाभागांचे म्हणने आसा कितें? धुवांकडल्यान अपेक्षा तरी कितल्यो करच्यो हाका लेगीत मर्यादा आसुंक जाय न्हय ? बरे तुमच्या पुताचेर जर अन्याय जाता आसलो, जाल्यार तुमी उग्गि रवताल्यात कितें ? पुताच्या काजारी जिवीतांत ढवळढवळ करपी, ताचेवय्ली आपली पकड धिली जायित ह्या नीच विचारान सुनेविरुद्ध पुताकडेन चाड्यो करप , खलबता करप सुरु जाता आनी त्या चेडवाचे जिवीत नरक जावंक सुरु जाता।
सावधान !!! आधुनिक पणाचो बुरखो घालून मागास विचारांच्या विळख्यातले आवय-बापूय आमच्या समाजात अजुनुय वावरतात : आधुनिक आनी पुरोगामी विचारांनी चलपी, आपल्या काजार जाल्ल्या पुताक आनी सुनेक ताचे स्वातंत्र्य दिवपी आनी फक्त गरज पडत तेन्नाच तांकां मार्गदर्शन करून तांच्या मदें मोग वाडच्या दिश्टीन पूरक वातावरण तयार करपी चेड्या-चेडवांचेे आवय-बापूय आमच्या समाजांत आयज लेगीत आसात. खरेच तांची ही प्रवृत्ती खूब वाखाण्णी करपा सारकीं आसा. पूण चेडवांचे आवय-बापायनु,सावधान आनी सादूर रावात ! आधुनिकपणाचो, पुरोगामीपणाचो बुरखो घालून आपूण खूब देवभिरांतीचे आसात अशे तुमकां आनी चडकरून समाजा सामकार सोंग करपी पूण घरांत मात बुरसटलेले विचार आनी मागासपणाचे आनी चंडाळपणाचे आचरण करपी (भ्रामक विचारांची व्यक्तिमत्वा) अजून लेगीत समाजांत उजळ माथ्यान वावरतात. तांच्या ह्या भ्रामक सभावाक चेडवांचे पालक बळी पडटात आनी निश्पाप- निश्कलंक चेडवांचे वाटोळे जाव शकता, जर तांच्या पाशांतल्यान आपल्या धुवेची सोडवण करूंक नासली तर !! आपलो पूत आपल्या पासून पयस वयता कितें अशा विचारांनी मागीर चेड्याची आवय आपली खलबता सुरु करून चाड्यो करून ताका ताचे बायले पासून पयस व्हरचे दिश्टीन ताचे कान भरूंक सुरु करता. पूण जायते चेडें अशा कारस्थानी कृत्याचे बळी पड नांत, ते योग्य रितीन आपली बायल आनी आपली आवय-बापूय हांचे मदें योग्य समतोल राखतात, पूण कांय कमकुवत मना-काळजाचे चेडे जांका स्वताचे मतस्वातंत्र्य नासता…. स्वताचे अस्तित्व नासता, ते आपल्या आवयच्या आनी बापायच्या विचारांक बळी पडटात आनी मागीर सुरु जाता तो त्या चेडवाचेर कुडीचो आनी मानसिक अत्याचार.
अत्त्यचाराचे कांय प्रकार : तिच्यो आवडी-निवडी हांचो विचार करी नासतना आनी तिचे करियर बद्दल चिंती नासताना ‘तू तुजी नोकरी सुद्धा कर पूण घरांतले लेगीत सगळे काम करुंक जाय वो तशें झेपत नासत तर नोकरी सोड आनी घरकाम कर ‘, ‘तु तुज्या बापाय कडल्यान दुडू हाड, भांगार हाड,’ ‘बायलांनी घरांतच रावचे,’ ‘ तू म्हज्या आवयक आता आराम दिवंक जाय,’ अशा उतरांनी चेडवाचेर अत्याचार सुरु जातात आनी त्या उपरांत तिका मुद्दाम तिचे क्षमतेपरस अधिक वावर दिवपा सारके आनी हेर किळसवाणे प्रकार सुरु जातात जेणेकरून मुक्त आनी पुरोगामी वातावरणांत वाडलेल्या त्या धुवेचे खच्चीकरण सुरु जाता. तिची घुस्मट सुरु जाता. तिणे जर तोंड उघडले तरी तिका चेडयाचे आवय-बापायकडल्यान धमकी वजा समज मेळटा. आनी कितेच कारण मेळुंक नासल्यार तांच्या चरित्राचेर शिंतोडे उडोवंक सुरु करप. ‘ तुज्या सासरयाक दुद व्हरुन दी अशे आपल्य़ा नव्य़ान काजार जावन आयलेल्या सुनेंक आदेश दिवपी कांय सासवो आनी निर्लज्ज सासरे अजुनुय ह्य़ा समाजांत आसात, अशे तरेन चेडवाचे जिवीत नरका समान जाता. कितलेच फावटी चेडवा ह्या अत्याचाराक कंटाळून आत्म्यहत्त्या लेगीत करतात, पूण कांय धाडशी धुवो ह्या प्रवृत्तीक सोडचीट दिवन मेकळो श्वास घेतात… कित्याक अशा चेड्या सांगाता आनी अशा कोत्या आनी मागास विचारांच्या घराब्यांनी फ़कत लोक कितें म्हणतीत म्हणुन आमच्या धुवांनी आपले जिवीत पिड्यार करचे कितें ? आपल्य़ा धुवेक न्याय दिवपाचे धारिश्ट्य तिच्या आवय- बापायकडेन आसुंक जाय, कित्याक एक सक्शम भूर्गे म्हूण तिचे आवय-बापायन तिका वाडयलेले आसता.
काश्टी भिजय नासताना थिगूर (ढेकूळ) मारपी प्रवृत्तीच्या पंडितांनी आयजच्या बदलपी परिस्थितीचो विचार केला कितें? व्हॉट्सॅपचेर फुकट उपदेश दिवन समाजाची तोखणाय मेळोवपाचो यत्न करपी ह्या महाभागांक एक प्रस्न विचारचो असो दिसता, काश्टी भिजय नासताना थिगूर मारपी प्रवृत्तीच्या ह्या पंडितांनी आयजच्या बदलपी परिस्थितीचो विचार केला कितें? अशा परिस्थितींत त्या धुवांनी आपलेर जावपी अन्यायाक वाचा फोडची की एक अस्तुरी म्हळ्यार ‘ चूल आनी मूल,’ ‘ दिली थंय मेलीं ‘, ह्यो बुरसटलेल्यो कल्पना अंमलांत हाडूंक स्वताचो बळी दिवचो? अन्याय सहन करपी अशा धुवांच्या आवय-बापायन कितें करचे? आपल्या धुवेक त्या अत्याचारी वातावरणांत दवरून तिका मरूंक सोडचे?
पुरोगामी विचारी लोकांचे मत : कांय पुरोगामी विचारी लोकांचे दिश्टीन अशा परिस्थितीत चेडवांक आमी आधार दिवंक जाय, अशा अत्याचारी वातावरणांतल्यापन तिची सोडवण करूंक जाय आनी अशा प्रवृत्तीच्या लोकांक जाप विचारुंक जाय आनी अशा अन्यायाचे विरुद्ध संघर्श करून त्या चेडवाक न्याय मेळोवन दिवंक जाय. ‘ चूल आनी मूल ‘, वो ‘ दिली थंय मेली ‘, ह्या नराधमी विचारांक आता तिलांजली दिवंक जाय. दर वर्सा भाशेन आमी अंदू लेगीत आंतरराश्ट्रीय बायलांचो दीस मनयतात ह्या पासोत एक विचार मंथन जावन आचारणांत येवंक जाय.
विचार करात आयज जग खंय पावला ते. वेगवेगळ्या क्षेत्रांत आयज बायलांनी खूब उंच उडना घेतल्या. राजकी, प्रशासकी, कार्पोरेट, संरक्षण, शिक्षण आनी हेर मळार आयज बायलो खूब व्हड संख्येन मुखार येताना दिसता. चूल आनी मूल ही प्रवृत्ती दवरल्यार आयज मानादिक द्रौपदी मुर्मू देशाची राश्ट्रपती जाई नासली. मानादिक प्रतिभा पाटील, मानादिक इंदिरा गांधी, सुशमा स्वराज, निरुपमा राव परराश्ट्र सचीव जाई नासली. निर्मला सितारामन, एअर मार्शल पुनीता बंदोपाध्याय, सुधा मूर्ती, किरण बेदी, कल्पना चावला… अशी कितलीशीच नावा आमचे नदरेमुखार येतात आनी बायलांबद्दल आशिल्लो संकुचीत दिश्टीकोण गळून-जळून नश्ट जाता. एक बापूय, भाव, घरकार, सासुपाय वो इश्ट म्हूण बायलांचे उदरगतीक हातभार लावुया आनी तांच्या अस्तिवाचो मान राखून ह्या समाजांत परिवर्तन घडोवन हाडुया. दुतोंडी प्रवृत्तींचो पर्दाफाश करूया. एक सून म्हूण जेन्ना एक चली आपल्या आवय-बापायचे घर त्यागून येता, तेन्ना तिचे काळीज-मन समजून घेवन तिका बरी वागणूक दिवया. आपलेपण दाखोवन तिचे मदें आत्मविश्वास निर्माण करुंया. व्हॉट्सॅप ग्रुपांनी फुकट सल्लो दिवन समाजाची तकलीं बेजार करप आनी बंद करुया !!
हे मोगाळ समाजा ऽऽऽ, धुवांक आत्मनिर्भर, स्वावलंबी आनी सक्षम करपी आवय-बापायचे खच्चीकरण बंद कर
– लुईस रॉड्रीग्स, संपादक, luirods@yahoo.com
