सॉरी मॉम-डॅड, आय एम लूझर म्हणून विद्यार्थीनीची आत्महत्या

उजवाड ब्युरो: सध्या परिक्षेच्या ताणाक लागून भुरग्यां मदीं आत्महत्येचें प्रमाण वाडिल्ल्याचें दिसून येता. कोटा हांगा अशींच एक घडणूक मुखार आयल्या. 30 जानेवारीक जावपी जेईई (JEE) मेन्स परिक्षे आदीं सोमारा कोटा हांगा निहारिका (18) नावांचे विद्यार्थीनीन गोळ घेवन आत्महत्या केली. तिच्या कुडींत एक सुसायड नोटय मेळ्ळी, तातूंत तिणें बरयल्लें, ‘सॉरी मॉम- डॅड, आय एम लूझर, हांव जेईई फेल जालें, म्हणून हांव आत्महत्या करतां. होच निमाणो पर्याय’.
निहारिका बारावेंत शिकतालें आनी जेईईची तयारी करताले. अभ्यासाच्या ताणांतल्यान निहारिकान आत्महत्या केली अशें कुटुंबांन सांगलें. निहारिका अभ्यासांत हुशार आशिल्लें. फाटल्या वर्सा तिका बारावीत उणे गूण मेळ्ळे. देखून ते परतून 12 वी करताले आनी जेईईचीय तयारी करताले. तिची जेईई मेन परिक्षा 30 जानेवारीक आशिल्ली. परिक्षेक लागून तिचेर खूब ताण आशिल्लो. ते दर दिसा 6- 7 वरां अभ्यास करताले अशें निहारिकाचो चुलत भाव विक्रमान सांगलें.
तीन भयणीं मदीं निहारिका व्हडली. तिचो बापूय विजय बँकेंत गनमॅन आसा. विजय सोमारा सकाळीं ड्युटेक गेलो. निहारिका दुसऱ्या माळ्यार आपल्या कुडींत अभ्यास करताली. घरांतले हेर वांगडी सकयल आशिल्ले. सकाळीं सुमार 10 वरांचेर निहारिकाच्या आजयेन कुडीचें दार वाजयले. निहारिकान दार उगडलें ना. आजयेन बोवाळ करून सगळ्यांक आपयले. जेन्ना आमी त्या जाग्यार पावले तेन्ना निहारिका गोळ घेतिल्ले स्थितीत दिसलें अशेंय विक्रमान सांगलें.

सप्तकांत दुसरी आत्महत्या..

कोटांत एका सप्तका भितर विद्यार्थी आत्महत्या जावपाची ही दुसरी घडणूक. हाचे आदीं नीटाची (NEET) तयारी करपी एका विद्यार्थीनीन 23 जानेवारीक आत्महत्या केल्ली. मोहम्मद जैद (19) हो उत्तर प्रदेशांतल्या मुरादाबाद रावपी आशिल्लो. ताणें हॉस्टेलाच्या कुडींत गोळ घेवन आत्महत्या केली. ही घडणूक 24 जानेवारीक उजवाडाक आयली. 2024 वर्सा विद्यार्थ्यांनी आत्महत्या करपाची ही दुसरी घडणूक.

भांगरभुंयच्या बरेपणान…