पिशे लोकच समाजात परिवर्तन घडोवन हाडटात – मंत्री गोवींद गावडे
बेळगांवच्या उजवाड म्हयन्याळ्याचो रुप्या उत्सव उमेदीन
उजवाड ब्युरो – बेळगांवः ल्हान भुरग्यांचेर संस्कार – तांचे आवयभाशेंतल्यानूच जातात. दरेकल्यान आपली आवयभास सांबाळपाक जाय. संवसाराचे फाटीर खंयचोय कोंकणी मनीस गेलो जाल्यार – ताका ताचे आवयभाशे वयल्यानूच वळखतात, अशें गोंयचे कला आनी सांस्कृतीक मंत्री गोविंद गावडे हांणी – सांगलें.
सोमार, १५ जानेवारी दिसा संपन्न जालेल्या बेळगांवच्या उजवाड ह्या कोंकणी म्हयनाळ्याच्या रुप्या महोत्सवी – कार्यावळींत गावडे मुखेल सोयरे म्हूण उलयताले. उजवाड कोंकणी म्हायनाळ्याक 25 वर्सा पराय जाल्ले निमतान सेंट झेवियर्स हायस्कूल हॉल कॅम्प बेळगांवां कोंकणी महोत्सव आयोजीत केल्लो. हे कार्यावळीक गावडे हांचे वांगडा बेळगांवचे बिशप डॉ. डॅरीक फर्नांडीस अध्यक्षपदार आशिल्ले. बेळगांव उत्तरचे आमदार राजू सेठ, कोंकणी साहित्यीक आनी अखील भारतीय कोंकणी समेलनाची अध्यक्ष हेमा नायक, मिलाग्रीस कॉ- ऑपरेटिव्ह सोसायटीचे अध्यक्ष जॉर्ज फर्नांडीस, साहित्यीक प्रा. डॉ. भूषण- भावे, लुईस रॉड्रिग्स माचयेर हाजीर आशिल्ले.
कार्यावळीचो आरंभ कवी गौरिश वेर्णेकार हाणीं बरयिल्ल्या आनी विवियन रॉड्रीग्स आनी अनिता लिमा हाणीं सादर केल्ल्या उजवाड स्पेशल येवकार गायनान जाली. ह्या सुरेल गायनान हजर आशिल्ले सगळें मंत्रमुग्ध जावन गेले.
फुडें उलयताना मंत्री गावडे हांणी सांगलें, कोंकणी गोंयची राजभास. कोंकणा लोक संवसारभर पातळ्ळ्यात. कोंकणी भाशेच्या संवर्धना खातीर आमचें सरकार सदांच यत्न करता. 25 वर्सा अखंडपणान चलिल्ल्या घांटमाथ्या वयल्या उजवाड ह्या कोंकणी म्हयनाळ्याचें, ताच्या संपादकाचें आनी ताच्या पुराय पंगडाचें तांणी कवतूक केलें. ‘ संपादक लुईस रॉड्रीग्स आनी टीमाक हांव ताणी फाटली २५ वर्सां केल्ल्या वावराक सलाम करता. जायत्या आव्हानांक मुखार वचून कोंकणी भास आनी संस्कृताय थिगोवन दवरल्या खातीर तांकां म्हजो धिनवास,‘ गावडे हानीं म्हळें
समाजात पिशें लोकच परिवर्तन घडोवन हाडटात : गावा गावा आनी घरा घरांनी पिशाभाशेन फिरून वर्गणीदार वाडोवपी लुइस रॉड्रीग्स एक पिसो मनीस आसा आनी सामकार बशिल्ले तुमी सगळें शाणे. हे म्हणटा म्हूण राग मानचो न्हय. पूण समाजांत आयजमेरेन परिवर्तन घडोवन हाडला ते पिशांनीच घडोवन हाडला. अशे म्हणून संपादक लुईस रॉड्रीग्स हाणीं कोंकणी संवर्धना खातीर जिद्दीन केलेल्या वावराची तोखणाय केली.
येवकाराच्या उलोवपांत लुईस रॉड्रिग्स हांणी उजवाडचे वाटचालीचो नियाळ घेतलो. उजवाडच्या खडतर वाटचालीचो नियाळ घेताना लुईस रॉड्रीग्स हाणीं म्हळें की फाटल्या २५ वर्सांची दुख्खा फाटी घालून आता फुडल्या पंचवीस वर्सां खातीर नियाळ नियोजन करूंक जाय.
प्रा. भावे हांणी सांगलें, कोंकणीचें सांस्कृतीक राज्य जावपाक जाय. कोंकणी मनीस संवसाराचे फाटीर खंयूय आसलो तरी ह्या कोंकणी सांस्कृतीक राज्याचो तो घटक आसपाक जाय. वेगवेगळ्या भागांनी वेगवेगळे तरेन कोंकणी भास उलयतात. कर्नाटकांत आनी केरळांत कोंकणी अकादेमी आसा, पूण महाराष्ट्रांत कोंकणी अकादेमी ना. ते खातीर गोंय सरकारान यत्न करपाक जाय. तशेंच गोंया भायर सुरू आशिल्ल्या कोंकणी भाशा आनी संवर्धना खातीर गोंय सरकार आनी गोंयांतल्या संस्थांनी आदार दिवपाक जाय, अशें तांणी सांगलें.
आमदार राजू सेठ, बिशप डॅरीक फर्नांडीस, जॉर्ज फर्नांडीस हांणी ह्या वेळार आपले विचार मांडले आनी लुईस रॉड्रीग्स आनी टीमच्या वावराची तोंडभरून तोखणाय केली. ह्या वेळार मिलाग्रीन डिसोझा, आनामेरी बारदेस्कार, मोनिका डान्टस, गीता सुरेंद्र भगत, डॉ. मनिषा रेगो, बस्तू रेगे – संतुलन संस्था, अशोक पै, फादर प्रदीप कोरेया, अंतोन डिसोझा, सावियो परेरा, आगोस्तीन शाहू ब्बारदेस्कर, गौरीश वेर्णेकार, गाब्रियेल डिसोझा , गौरीश रमाकांत वेर्णेकर अश्या 14 जाणांक उडवाड वतीन कोंकणी गौरव भोवमान पुरस्कार भेटयलो. जाल्यार आल्फी मंतेरो, मिनीन गोन्साल्वीस, इलेन बोर्जीस, ॲड संजय डिक्रूझ आनी हेरांचो उत्कृश्ट लेखक म्हूण भोवमान केलो.
रुच्चिक नुस्ते जेवणा उपरांत दनपारच्या सत्रांत कला आनी संस्कृती खात्या वतीन आयिल्ल्या 25 ते 30 कलाकारांनी रंगतदार कोंकणी लोकनाचांची आनी परंपरीक गितांची कार्यावळ सादर केली.
कार्यावळीक बेळगांव, गडहिंग्लज, चंदगड, पुणे, मुंबय, गोंय आनी हेर वाठारांतल्यान व्हड संख्येन कोंकणी भाशीक हाजीर राविल्ले. मिनीन गोन्साल्वीस आनी तानिया रॉड्रिग्स हांणी सुत्रसंचालन केलें. इलेन बोर्जिस हांणी उपकार मानले.
ही कार्यावळ यशस्वी जावपाक एलिझाबेथ रॉड्रीग्स, आंब्रोस डिसोझा आनी टीम, सायमन लोबो, सेबेस्तियान डिसोझा आनी हेरांनी खूब मोलादिक वावर केलो.
