लुईस रॉड्रिग्स उजवाड ब्युरो, बेळगाव : डिसेंबर 1 :
माझ्या धेनात मनात सपनांत दिसे
शांप्राशावेराची मूऽऽरती….
धावत-पळत दर्शनासाठी,
गेलो मी गोया शेराशी……
40 वयर वर्सांची पर्जळीत आनी भक्तीमय परंपरा सुरु दवरत बेळगाव आनी दक्षिण महाराष्ट्र वाठारांतल्या भावार्त्यांनी ह्या वर्सा लेगीत पोरण्या गोंयची पादयात्रा सुरू केल्या. गडहिंगलज, कोल्हापूर, इचलकरंजी, आनी शेजारच्या वाठारांतल्या यात्रेकरुंनी 29 नोव्हेंबराक ह्या पादयात्रेचो आरंभ केलो जाल्यार बेळगाव आनी आजरा हांगाच्या पादयात्रींनी 30 नोव्हेंबराक पादयात्रेक आरंभ केलो. कोव्हीड काळ सोडल्यार 1982 थावन ही पादयात्रा अखंडीत सुरु आसा. दरवर्सा सगळें पादयात्री पायान चलत वचून गोंयच्या सायबाक आपली आंगवोन अर्पण करतात.
वत , थंड आनी पावसाची तमा बाळगी नासतना दक्षिण महाराष्ट्र वाठारांतले कांय यात्रेकरु नेसरी, हेरे हुपून सुंक्रारा सांजे भेडशी पावले. नामनेचो जज्विट पाद्री फादर ज्यो मंतेरो ( ही पादयात्रा आरंभ केल्ल्या सर्गेस्त स्वामी प्रभुधरचो भाचो) हाचे वांगडा दक्षिण महाराष्ट्रांतल्यान आयलेल्या सुमार 250 यात्रेकरुंच्या पंगडा सांगाता सांफ्रान्सीस शावेराच्या दर्शनाखातीर मार्गक्रमण करता.
1982 वर्सा स्वामी प्रभुधरानच कोल्हापूर जिल्ह्यांतल्या अजरा शारा सावन पोरन्या गोंयची यात्रेची सुरवात फकत सात यात्रेकरुंक घेवन केल्ली. वर्सां भितर आतां हो आंकडो गुणाकार जाला आनी कोविडा पयलींच्या काळांत हो आंकडो एक हजार यात्रेकरुंक हुंपून गेल्लो. पूण आतां हो आंकडो मातसो उणो जालो आसलो तरी लोकांचे मदें खूब उर्बा आसा. पयसपयस थावन भावार्थी ह्या पादयात्रींत वांटो घेवंक लागल्यात.
बेळगाव आनी खानापूर हांगाच्यान भायर सरल्ल्या पंगडा मदें हेर धर्मांतले यात्रेकरू व्हड प्रमाणांत आसात. स्तोत्रां आनी तेर्स-रजार भेटयत आनी कांतारांचे गायन करते तसेच सांत फ्रान्सीस शावेराचो नामजप करत बेळगाव आनी खानापूरच्या यात्रेकरुंनी शुक्रारा सकाळीं पादयात्रा सुरु केली. अदमासान 700 वयर पादयात्री आयतारा सकाळीं पोरन्या गोंयांत पावतले आनी आपल्या आश्रयदात्या संताच्या पांयांलागी आपलीं प्रार्थना आनी याचिका अर्पण करतले. हेर धर्मांतले जायते दादले-बायलो हे यात्रेचो भाग जावन आसात.
ही तीर्थयात्रा लोकप्रिय जाल्याच, पूण आंतरधर्मीय समरसतायेचें प्रतीक जालां. हे यात्रेकरुं जयसर रावतात तांच्या सगळ्या गरजांची जतनाय घेवपी भोवसंख्य हिंदू समाजाच्या वतीर्न यात्रेकरुंक न्हावपाक गरम उदक, जेवण मोगान दिवपाची उदाहरणा दिश्टी पडटात. ही यात्रा म्हळ्यार एक तरेन आंतरधर्मीय समरसतायेचे प्रतिरूप जाला अशें फादर मंतेरो हांणी सांगलें.
बेळगांवचे गूट शुक्रारा जांबोटी हांगा एका मंदिरांत पावलो. थंयसरले हिंदू भाव-भयणीं तांची सेवा करतात. तेच भाशेन वाळपय हांगा ह्या पादयात्रींक घाटमाथ्यावयले सुपूत आनी ज्येश्ट फ्रान्सेलियन पाद्री फादर संतान गामा आनी टीम तांका च्या, रातचे जेवण, दुसरे दिसा सकाळचो नास्ता तसेच तांच्या रावपाची सोय करतात. दर वर्सा भाशेन साखळीचो नील मंतेरो आनी वागातोर रावपी टोनी थॉमस फर्नांडीस हें पदयात्रीन आयलेल्या लोकांक जेवण दितात.
आजरा सावन हिंडगांव, भेडशी, डिचोली, साखळी, आनी पोरनो गोंय आसो प्रवास
फा.मेलविन पायस पॅरिश प्रीश्ट आनी फा. अँथनी पेस, गुरू संतांजी, फा.संतोष वसई हांचो 25 जाणांचो पंगड काल बेलेवाडी सावन आजऱ्याक आयला. अजरासावन 50 ते 60 लोक पदयात्रेन वतात. ह्या पंगडांत सगळी मेळून 100वयर पादयात्री आसतले. कासरकांडगांव हांगाच्या हिंदू वारकरी पंथाच्या लोकांनी दर वर्सा भशेन सगळ्यांक नाश्तो आनी च्या दिवुन क्रिस्तांव लोकांक शुभेच्छा दिली.
(धिनवास : फादर ज्यो मंतेरो, फा. कुस्तास लिमा, विल्सन करव्हालो आनी मोतेस रॉड्रीग्स, आजरा )
