उजवाड ब्युरो 22 नोव्हेंबर : खानापूरच्या मिलाग्रीस सायबीण इगर्जींत 29 भुरग्यांक आयतार, 19 नोव्हेंबर दिसा 14 युवक आनी 15 युवतींक दिलो थिरावणेंचो (क्रिज्मांचो) संस्कार. सगळी भुरगी तांचे आवय-बापुय, मदन-पदन, बिशप आनी पाद्री हांणी पुरसावांत इगर्जेंत भितर सरले. वेदीचेर मुखेल जावून बिशप डेरीक फर्नांडिस, पॅरिश प्रीश्ट कुस्तास लिमा, आयटीआय चे मुखेल फा. सॅड्रीक, फा.पॉल अंकुश सर्वोदयाचो प्रिन्सिपॉल फा.नेल्सन पिंटो हांणी व्हड भक्तीभावान मीस भेटयले. मिसाच्या शेर्मावांत बिशप सायबान सांगले की बाल्तीमांक तुमी आवय-बापायच्या आनी मदन-पदनीच्या सांगाता येतात आनी तुमी इग्रज मातेचे सांधे जातात. पूण आयज तुमकां थोडी बुद्धी आयल्या, ह्या पासोत स्वता: जाऊन हांगा आयल्यात. थिरावणेचो संस्कार घेतल्या उपरांत देवाच्या भिरांतीन, जाणवायेन तुमी रावुंक जाय रावोंक जाय. वारो तुमकां आसा म्हणून कळता पूण दिश्टी पडना. तेंच परी पवित्र आत्मो पारव्याच्या रुपान आयिलो तो पेंन्तेकोस्टाच्या दिसा दिश्टीक पडलो. आयज तुमचेर तो देवोंन येतलो. आयच्या वांजेलाचेर नदर मारल्यार आमकां कळीत जाता की, ताच्या ताच्या स्थिती परमाणे पवित्र आत्म्यांचे आमकां देणे मेळता.
बिस्प सायबान, क्रिज्मांच्या भुरग्यांक दोतोनीचेर थोडे प्रश्न विचारले. तांका थिरावणेंचो संस्कार दिलो आनी उंड्याचो सांक्रामेंत दिलो. ह्या वेळार बिस्प सायबान सगळ्यांक कोंत आनी सर्टीफिकेट्स दिले.
सगळी भुरगी एकाच तरेच्या ड्रेसांत फुलांबासेन दिसतालींत ह्या दबाजीक संस्काराची तयारी कृपानिवासाच्यो सिस्टर्स सि.प्रेसिल्ला सि.बर्था, सि.इरमां, सविता हांणी केली. ह्या सुवाळ्यांत हरसनवाडी, मणर्तुगा, नंदगड, बेंगळुर हांगा रावपी सिस्टर्स, फा.पॅट्रिक, ब्रदर थॉमस, फा.डेन्झील, पॅरिशनर्स सोयरे दायरे हाजीर आसलेंत. आयलेल्या सगळ्यांचे पॅरिश प्रीश्ट कुस्तास लिमा हांणी व्हड खुशयेन आधार दिलेल्यांचो काळजा मनाथावन उपकार मानले.
– एलेन मार्यान बोर्जीस